भुदरगड (सलीम शेख) : छत्रपती शिवाजी महाराजांच्या पदस्पर्शाने पावन झालेल्या आणि तालुक्याचे वैभव असलेल्या ऐतिहासिक किल्ले भुदरगड या स्थळाला आता साहसी खेळांची भव्य जोड मिळाली आहे. गडाचे जतन आणि संवर्धन कायम ठेवत, त्याला आंतरराष्ट्रीय दर्जाचे पर्यटनस्थळ बनवण्याच्या प्रयत्नांना या महत्त्वपूर्ण उपक्रमामुळे मोठे बळ प्राप्त झाले आहे. गडावर मंजूर झालेल्या आणि बहुप्रतिक्षित असलेल्या साहसी ॲक्टीव्हीटींचा शुभ उद्घाटन सोहळा दि. ०९ नोव्हेंबर २०२५ रोजी प्रमुख मान्यवरांच्या उपस्थितीत मोठ्या उत्साहात संपन्न झाला.
भुदरगड किल्ल्यावर सुरू करण्यात आलेल्या या नव्या ॲक्टीव्हीटींमुळे हा किल्ला आता केवळ ऐतिहासिक वारसा न राहता, साहसी पर्यटनाचे केंद्र बनणार आहे. सुरू करण्यात आलेल्या प्रमुख सुविधांमध्ये खालील बाबींचा समावेश आहे:
ॲडव्हेंचर स्पोर्टस: पॅरामोटरींग, पॅराग्लायडींग (ज्याचे पर्यटकांमध्ये मोठे आकर्षण असेल), झोरबिंग बॉल
वॉटर स्पोर्टस: वॉटर बोटींग, कायाकिंग
इतर सुविधा: टेलिस्कोप (दूरदर्शन), फ्लोटिंग जेटी (तलावात तरंगणारी जेट्टी)
या नवीन सुविधांमुळे भुदरगड किल्ला संपूर्ण कोल्हापूर जिल्ह्यातील पर्यटकांसाठी एक प्रमुख आकर्षण ठरणार आहे.
ऐतिहासिक किल्ले भुदरगडचे जतन आणि संवर्धन अबाधित ठेवत, या ठिकाणी पर्यटकांना उत्कृष्ट सुविधा पुरवण्यासाठी सातत्याने प्रयत्न केले जात आहेत. या साहसी खेळांच्या शुभांरभापूर्वीच गडाच्या डागडुजीची कामे पूर्ण करण्यात आली आहेत. तसेच, लहान मुलांसाठी बालोद्यान आणि गडावरील तलावात बोटिंगची सुविधा यापूर्वीच उपलब्ध करण्यात आली आहे. नव्याने सुरू करण्यात आलेले साहसी खेळ, विशेषतः पॅराग्लायडिंग, पर्यटकांसाठी एक मोठी पर्वणी ठरणार असून, यामुळे तरुणाईला मोठा उत्साह लाभणार आहे. येणाऱ्या पर्यटकांना चांगल्या सुविधा मिळवून देण्यासाठी आणि गडकिल्ल्यांचे जतन करण्यासाठी स्थानिक प्रशासन आणि लोकप्रतिनिधी कटिबद्ध असल्याचे यावेळी स्पष्ट झाले.
या महत्त्वाच्या आणि ऐतिहासिक कार्यक्रमासाठी पालकमंत्री प्रकाश आंबिटकर, ज्येष्ठ नेते बाळकाका देसाई, भाजपा जिल्हाप्रमुख नाथाजीराव पाटील, गोकुळ संचालक नंदकुमार ढेंगे, के.जी. नांदेकर, दत्ताजीराव उगले, कल्याणराव निकम, मदनदादा देसाई, ॲड. शिवाजीराव राणे, दौलतराव जाधव सर, जयवंतराव चोरगे, धैर्यशिल भोसले सरकार, शिवसेना तालुकाप्रमुख संग्रामसिंह सावंत, नामदेवराव चौगले, बी.डी. भोपळे, सुर्याजीराव देसाई, अलखेश कांदळकर, सुनिलराव निंबाळकर, शिवाजीराव ढेंगे, सर्जेराव देसाई यांच्यासह तालुक्यातील प्रमुख मान्यवर आणि नागरिक मोठ्या संख्येने उपस्थित होते. उपस्थित मान्यवरांनी या साहसी उपक्रमांचे स्वागत केले आणि भुदरगडच्या पर्यटन विकासासाठी शुभेच्छा दिल्या, ज्यामुळे परिसरातील तरुणांना रोजगाराच्या संधी उपलब्ध होतील, अशी आशा व्यक्त केली.
