दुर्दैवी अपघात: कोल्हापूर-गारगोटी रस्त्यावर कूरजवळ भीषण धडकेत कोल्हापूर येथील तरुणाचा जागीच मृत्यू!
गारगोटी (प्रतिनिधी ) : कोल्हापूर-गारगोटी मुख्य रस्त्यावरील कूर-मुदाळ (ता. भुदरगड) दरम्यान, रविवार दिनांक १६ नोव्हेंबर २०२५ रोजी दुपारी झालेल्या एका भीषण अपघातात कोल्हापूर येथील एका ४१ वर्षीय तरुणाचा जागीच मृत्यू झाला. भरधाव वेगात असलेल्या ट्रकने दुचाकीस्वाराला पाठीमागून जोरदार धडक दिल्याने हा दुर्दैवी अपघात घडला.
मिळालेल्या माहितीनुसार, मितेश रवींद्र टेंबे (वय ४१, रा. राजारामपुरी १० गल्ली, कोल्हापूर) असे अपघातात मृत्यू झालेल्या तरुणाचे नाव आहे. मितेश टेंबे हे त्यांच्या दुचाकीवरून (क्र. एम. एच. ०९ जी. जी. ८२६४) प्रवास करत होते. मुदाळकडून गारगोटीकडे येणाऱ्या टाटा ट्रकने (क्र. एम. एच. ११ ए. एल. ७५०७) कूर कालव्याजवळ त्यांच्या दुचाकीला पाठीमागून जोरदार धडक दिली. ही धडक इतकी भीषण होती की, मितेश टेंबे यांना गंभीर दुखापत झाली आणि त्यांचा घटनास्थळीच मृत्यू झाला. अपघातानंतर लगेचच नागरिकांनी घटनास्थळी गर्दी केली.
याप्रकरणी, गौरव सूर्यकांत कुलकर्णी यांनी भुदरगड पोलिसांत फिर्याद दाखल केली आहे. पोलिसांनी ट्रकचालक संजय राजाराम देसाई (रा. नाधवडे, ता. भुदरगड) याच्यावर गुन्हा दाखल करून त्याला ताब्यात घेतले आहे. या अपघातामुळे कोल्हापूर-गारगोटी रस्त्यावर काही काळ वाहतुकीची कोंडी झाली होती. पोलिस उपनिरीक्षक योगेश गोरे आणि हेड कॉन्स्टेबल गवळी अधिक तपास करत आहेत. या दुर्दैवी घटनेमुळे टेंबे कुटुंबियांवर शोककळा पसरली आहे.
