विमानतळ प्रशासनाविरुद्ध तामगाव ग्रामस्थांचा ‘राडा’: गेट अडवून ‘भिंत फोडण्याचा’ दिला इशारा!
गोकुळ शिरगाव (इरफान मुल्ला ) : कोल्हापूर विमानतळ प्रशासनाने उजळवाडी- तामगाव हा विमानतळा जवळील रस्ता बंद केल्यामुळे त्रस्त झालेल्या तामगाव ग्रामस्थांचा संताप अखेर आज उफाळून आला. प्रशासनाच्या दुर्लक्षामुळे आक्रमक झालेल्या शेकडो ग्रामस्थांनी थेट विमानतळाचे मुख्य गेट गाठून धडक आंदोलन केले, ज्यामुळे विमानतळावर काही काळ तणावाची परिस्थिती निर्माण झाली होती.
गावाशेजारून जाणारा महत्त्वाचा रस्ता विमानतळ हा विस्तारीकरणामुळे प्रशासनाने कोणताही पर्यायी मार्ग न देता बंद केला आहे आणि एक भिंत उभी केली आहे. परिणामी, तामगावच्या नागरिकांना, विशेषत: शाळेत जाणाऱ्या विद्यार्थ्यांना, जवळपास २० ते २५ किलोमीटरचा लांब वळसा घालून कोल्हापूर शहरात यावे लागत आहे. गेल्या दीड वर्षांपासून हा त्रास सहन करणाऱ्या ग्रामस्थांनी जिल्हाधिकारी, लोकप्रतिनिधी आणि पालकमंत्र्यांकडे वारंवार निवेदन देऊनही दखल न घेतल्याने, आज त्यांनी रस्त्यावर उतरण्याचा निर्णय घेतला.
आक्रमक घोषणाबाजी आणि गेटवर धडक विमानतळाच्या मुख्य गेटवर जोरदार घोषणाबाजी करत गेट अडवून धरले. या दरम्यान, एका आंदोलकाने “जर रस्ता खुला केला नाही तर ती भिंत फोडणार साहेब!” असा उघड इशारा देत, ‘कोल्हापुरी हिसका’ दाखवला. आंदोलनामुळे विमानातून आलेल्या आणि बाहेर जाणाऱ्या प्रवाशांना प्रचंड मनस्ताप झाला, तसेच विमानतळ एक तासाहून अधिक काळ अडवून धरण्यात आले.
पोलिसांनी वेळीच हस्तक्षेप करत आंदोलकांना गेटवरून बाजूला करण्याचा प्रयत्न केला, तेव्हा पोलीस आणि आंदोलक यांच्यात जोरदार खडाजंगी झाली.
प्रवाशांची गैरसोय आणि वाढता तणाव लक्षात घेऊन प्रशासनाने तातडीने सूत्रे हलवली. जिल्हाधिकाऱ्यांनी आंदोलकांच्या शिष्टमंडळासोबत त्वरित बैठक बोलावली. या बैठकीत विमानतळ प्रशासनाने ग्रामस्थांच्या मागणीचा विचार करून रस्त्याचा प्रश्न लवकरच मार्गी लावण्याचे आश्वासन दिले आहे. प्रशासनाच्या आश्वासनानंतर ग्रामस्थांनी आपले आंदोलन तात्पुरते मागे घेतले असले तरी, ‘रस्त्याचा प्रश्न मार्गी लागला नाही, तर यापेक्षाही उग्र आंदोलन करू’ असा इशारा त्यांनी दिला आहे. कोल्हापूर जिल्हाअधिकाऱ्यांनी दोन तारखेला याबद्दल बैठक बोलावलली आहे.
