हातकणंगले (सलीम शेख) : हातकणंगले पोलिसांनी केलेल्या जलद आणि अचूक कारवाईमुळे मोबाईल चोरीच्या प्रकरणातील तीन संशयितांना अवघ्या २४ तासांच्या आत ताब्यात घेण्यात आले. या कारवाईत एकूण १,४०,००० रुपये किमतीचा मुद्देमाल जप्त करण्यात आला आहे. फिर्यादी लालबाबू रामचंद्र यादव यांनी दिलेल्या माहितीनुसार, दि. १९ नोव्हेंबर २०२५ रोजी त्यांच्या भाड्याच्या खोलीच्या खिडकीत चार्जिंगला ठेवलेला मोबाईल (किंमत २०,०००/- रुपये) अज्ञात व्यक्तीने चोरी केला होता. प्रकरणाची नोंद हातकणंगले पोलिस ठाण्यात करण्यात आली. तपासादरम्यान पोलीस अंमलदार अमित कांबळे यांना गोपनीय बातमीदारामार्फत माहिती मिळाली की चोरीस गेलेला मोबाईल विक्रीसाठी तीन संशयित हातकणंगले-इचलकरंजी फाटा परिसरात येणार आहेत. पोलिसांनी तात्काळ सापळा लावून एक काळ्या रंगाची युनिकॉर्न मोटारसायकल (किंमत अंदाजे १,२०,०००/- रुपये) वरून येणाऱ्या तिघांना थांबवून ताब्यात घेतले. चौकशीत त्यांनी गुन्ह्याची कबुली दिली.
अंगझडतीत चोरीस गेलेला मोबाईल मिळाल्याने मोटारसायकलसह एकूण १,४०,०००/- रुपयांचा मुद्देमाल हस्तगत करण्यात आला आहे.
अटक झालेले नावे – शुभम सुधाकर गवळी (वय 23, रा. तारदाळ), शुभम आनंदा भिऊगडे (वय 19, रा. कोरोची) व अल्पवयीन बालक (वय 17) अशी असून सदर कारवाई वरिष्ठ अधिकाऱ्यांच्या मार्गदर्शनाखाली पोलीस निरीक्षक शरद मेमाणे यांच्या नेतृत्त्वाखाली मच्छिंद्र पटेकर, अमित कांबळे व मस्कुर मुल्ला यांनी केली. हातकणंगले पोलिसांनी सांगितले की, या आरोपींकडून आणखी गुन्हे उघडकीस येण्याची शक्यता असून पुढील तपास सहायक फौजदार समीर मुल्ला करीत आहेत.
