मुरगूडमध्ये सराफाकडून ग्राहकाची फसवणूक; ‘मिक्स सोने’ आणि ‘तुट’च्या नावाखाली वजन घटवले!

मुरगूड: (प्रतिनिधी-बाळासो कांबळे): मुरगूड येथील महाराणा प्रताप चौका जवळील एका सराफा व्यावसायिकाने एका महिला ग्राहकाला वारंवार ‘मिक्स सोने’ आणि ‘तुट’ (घसारा/वजावट) च्या नावाखाली कमी वजनाची सोन्याची अंगठी देऊन त्यांची आर्थिक फसवणूक केल्याचा गंभीर आरोप समोर आला आहे. डॉ. बाबासाहेब आंबेडकर नगर परिसरातील संबंधित महिला ग्राहक आता या फसवणुकीविरुद्ध ग्राहक न्यायालय गाठण्याची तयारी करत आहेत. सदर महिला ग्राहकाने मुरगूड येथील महाराणा प्रताप चौकातील सराफा दुकानातून मागील पाच वर्षांपूर्वी साडेचार ग्रॅम (४.५ ग्रॅम) वजनाची सोन्याची अंगठी बनवली होती. मात्र, सराफाने या व्यवहाराची पावती दिली नव्हती.

• वजन घटवण्याचा पहिला प्रकार: सुमारे एक वर्षापूर्वी ती अंगठी खराब झाल्यामुळे, महिलेने ती नवीन बनवून घेण्यासाठी त्याच सराफाकडे दिली. नवीन अंगठी बनवून देताना सराफाने जुन्या सोन्यातील ‘झिज’ आणि ‘मिक्स’ (अशुद्धता) वजा केल्याचे सांगून, साडेचार ग्रॅमची मूळ अंगठी ३.२० ग्रॅम (खड्यासह) वजनाची करून दिली. या नवीन अंगठीचीही पावती देण्यात आली नाही.
• दुसरा धक्का: अलीकडेच गरजेमुळे सदर महिला ग्राहक ती अंगठी मोडण्यासाठी (विक्री करण्यासाठी) गेली असता, त्या अंगठीचे वजन केवळ २.२५ ग्रॅम भरले. याचा अर्थ, केवळ एका वर्षात अंगठीच्या वजनात सुमारे १ ग्रॅमची मोठी तफावत (तुट) दिसून आली.

सराफाने पावतीची मागणी करूनही पावती दिली नाही. ४.५ ग्रॅमची अंगठी मोडून बनवल्यावर ३.२० ग्रॅम झाली आणि आता चौकशी केली असता ती केवळ २.२५ ग्रॅम भरली. या प्रकारामुळे गोरगरीब ग्राहकांची २२ कॅरेट सोन्याच्या नावाखाली कशी लुबाडणूक केली जाते, याबद्दल संताप व्यक्त होत आहे. “एका वर्षात अनेक ग्राहक दागिने बनवतात. २२ कॅरेटच्या नावाखाली प्युअर (Pure) सोने सांगून ग्राहकांची ही थेट लूट नाही का?” असा संतप्त सवाल या महिलेने उपस्थित केला आहे. फसवणूक झालेल्या या महिला ग्राहकाने आता कायदेशीर लढाई लढण्याचा निर्णय घेतला आहे. या लुबाडणुकीविरोधात लवकरच ग्राहक न्यायालय (Consumer Court) मध्ये तक्रार दाखल करण्याची तयारी सुरू असल्याचे त्यांनी सांगितले आहे. ज्या लोकांची अशाप्रकारे फसवणूक झाली आहे, त्यांनी जरूर ग्राहक न्यायालयात तक्रार करावी. अशा तक्रारींमुळे अजून अनेक लोकांचे होणारे नुकसान टळू शकेल, असे आवाहन या ग्राहकाने केले आहे.