कागलची दूधगंगा नदी विषारी! रसायनयुक्त पाण्यामुळे मासे मृतावस्थेत, नागरिकांचे आरोग्य धोक्यात!
कागल (सलीम शेख): कागल तालुक्यातून वाहणाऱ्या दूधगंगा नदीला मोठे प्रदूषण झाल्यामुळे नागरिकांच्या आरोग्यावर गंभीर संकट उभे राहिले आहे. नदीच्या पाण्यात मोठ्या प्रमाणावर घातक रसायनयुक्त पाणी मिसळल्याचा प्राथमिक अंदाज आहे. यामुळे नदीतील मासे मोठ्या संख्येने मृत होऊन पाण्यावर तरंगत आहेत, तर संपूर्ण नदीपात्रात तीव्र दुर्गंधी पसरली आहे. या घटनेमुळे सर्वात मोठी चिंता निर्माण झाली आहे ती म्हणजे, याच दूषित पाण्याचा पुरवठा कागल तालुक्यातील अनेक गावांना पिण्यासाठी केला जात आहे. हे विषारी आणि दुर्गंधीयुक्त पाणी पिण्यास नागरिक मजबूर असल्याने त्यांचे आरोग्य धोक्यात आले आहे. या गंभीर परिस्थितीमुळे स्थानिक नागरिकांमध्ये भीतीसह प्रशासनाविरुद्ध तीव्र नाराजी पसरली आहे.
दूधगंगा नदीच्या पाण्याचे झालेले प्रदूषण आणि मासे मृतावस्थेत आढळल्याने स्थानिक नागरिकांनी तीव्र संताप व्यक्त केला आहे. नदीतील हे विषारी पाणी आणि त्यामुळे होणारा संभाव्य आरोग्य धोका लक्षात घेता, प्रशासनाने तातडीने कठोर उपाययोजना करण्याची मागणी सर्वसामान्यांमधून जोर धरू लागली आहे: प्रशासनाने त्वरित नदीच्या पाण्याचे नमुने घेऊन ते तपासणीसाठी पाठवावेत. नदीत हे विषारी आणि रसायनयुक्त पाणी नेमके कोठून मिसळले जात आहे, याचा स्रोत शोधून तो त्वरित बंद करावा. नागरिकांना पिण्याच्या पाण्यासाठी दूषित पाण्याचा वापर टाळता यावा म्हणून, शुद्ध आणि सुरक्षित पिण्याच्या पाण्याचा पुरवठा तात्काळ सुरू करावा.
दूधगंगा नदीचे पावित्र्य आणि तिची उपयुक्तता लक्षात घेऊन, प्रशासनाने या गंभीर समस्येची दखल घेऊन तातडीने प्रदूषण थांबवावे, अन्यथा या भागातील नागरिकांना मोठे आरोग्य संकट पेलावे लागेल, असा इशारा स्थानिक नागरिकांनी दिला आहे.
