कागल: (प्रतिनिधी/सलीम शेख) : कागल तालुक्यातून एक अत्यंत धक्कादायक आणि माणुसकीला काळिमा फासणारी घटना समोर आली आहे. आठ एकर जमिनीच्या मालकीवरून झालेल्या कौटुंबिक वादातून एका ८१ वर्षीय वृद्धाला अमानुष मारहाण करण्यात आली आहे. शंकर गणपती निर्मळे (वय ८१) असे या जखमी वृद्धाचे नाव असून, त्यांना मारहाण करण्याची ही संपूर्ण घटना कागल येथील ग्रामीण रुग्णालयाच्या आवारातील सीसीटीव्ही कॅमेऱ्यात स्पष्टपणे कैद झाली आहे.
मिळालेल्या माहितीनुसार, निर्मळे कुटुंबामध्ये आठ एकर शेतजमिनीच्या वाटणीवरून चुलत दीर आणि वहिनी यांच्यात गेल्या काही दिवसांपासून तीव्र वाद सुरू होता. हाच वाद इतका विकोपाला गेला की, आरोपींनी ८१ वर्षीय वृद्ध शंकर निर्मळे यांना लक्ष्य केले. वृद्धाला मारहाण करतानाचा व्हिडिओ व्हायरल झाला असून, त्यात आरोपींनी निर्मळे यांना लाथा-बुक्क्यांनी आणि इतर वस्तूने बेदम मारहाण केल्याचे दिसत आहे. वयाची पर्वा न करता, कुटुंबीयांकडूनच झालेला हा हल्ला पाहून कोल्हापूर जिल्ह्यात संतापाची लाट उसळली आहे. या अमानुष हल्ल्याप्रकरणी कागल पोलिसांनी तातडीने कारवाई करत आठ जणांविरुद्ध गुन्हा दाखल केला आहे. गुन्हा दाखल झालेल्या आरोपींमध्ये विजया निर्मळे, सुवर्णा निर्मळे, शुभम निर्मळे यांच्यासह एकूण आठ जणांचा समावेश आहे. पोलिसांनी भादंविच्या संबंधित कलमांखाली गुन्हा दाखल केला असून, पुढील तपास सुरू आहे.
वृद्धत्व आणि आजारपणात आधार देण्याऐवजी त्यांच्याच कुटुंबीयांकडून केवळ जमिनीच्या तुकड्यासाठी झालेली ही मारहाण अत्यंत निंदनीय आहे. कोल्हापूर जिल्ह्यात या घटनेमुळे तीव्र संताप व्यक्त होत असून, आरोपींवर कठोर कायदेशीर कारवाई करण्याची मागणी नागरिकांकडून केली जात आहे. पोलिसांनी सीसीटीव्ही फुटेजच्या आधारे तपास अधिक वेगाने करून, या घटनेतील सर्व दोषींवर तत्काळ कठोर कारवाई करावी, अशी अपेक्षा व्यक्त केली जात आहे.
