जुगार प्रकरणात गुन्हा टाळण्यासाठ एक लाखची लाची मागणी; पोलीस कॉन्स्टेबलचा साथीदार कोल्हापुरात रंगेहात जेरबंद!
कोल्हापूर (सलीम शेख) : जुगार खेळल्याच्या प्रकरणात गुन्हा दाखल न करण्यासाठी तक्रारदाराकडून लाच स्वीकारताना हुपरी पोलीस ठाण्यातील एका पोलीस कॉन्स्टेबलच्या साथीदाराला लाचलुचपत प्रतिबंधक विभागाने , कोल्हापूर येथे रंगेहात पकडले आहे. या प्रकरणी पोलीस कॉन्स्टेबलसह दोघांविरुद्ध गुन्हा दाखल करण्यात आला आहे.
तक्रारदार आणि त्यांच्या मित्रांवर जुगार खेळल्याचा गुन्हा दाखल न करण्यासाठी हुपरी पोलीस ठाण्यात कार्यरत असलेला पोलीस कॉन्स्टेबल संदेश आनंदा शेटे (वय ३५) याने मध्यस्थी म्हणून खासगी व्यक्ती रणजित आनंदा बिरजे (वय ३६) याच्यामार्फत तक्रारदाराकडे एक लाख लाचेची मागणी केली होती.
तडजोडीअंती ही रक्कम सत्तर हजार इतकी निश्चित झाली. तक्रारदाराची लाच देण्याची इच्छा नसल्याने त्यांनी याबाबत एसीबीकडे तक्रार नोंदवली. एसीबीच्या पथकाने पडताळणी केल्यानंतर सापळा रचला.
दिनांक ०१/११/२०२५ रोजी पोलीस कॉन्स्टेबल संदेश शेटे याच्या सांगण्यावरून त्याचा साथीदार रणजित बिरजे याने तक्रारदाराकडून सत्तर हजार लाच म्हणून स्वीकारली. लाचेची रक्कम स्वीकारताच एसीबीच्या पथकाने रणजित बिरजे याला रंगेहात पकडले.
याप्रकरणी पोलीस कॉन्स्टेबल संदेश शेटे आणि त्याचा खासगी साथीदार रणजित बिरजे अशा दोघांविरुद्ध हुपरी पोलीस ठाण्यात भ्रष्टाचार प्रतिबंधक कायद्याखाली गुन्हा दाखल करण्याची प्रक्रिया सुरू आहे. पुणे येथील अँटी करप्शन ब्युरोच्या वरिष्ठ अधिकाऱ्यांच्या मार्गदर्शनाखाली ही कारवाई करण्यात आली.
