कोल्हापूरमध्ये बेशिस्त पार्किंग आणि अतिक्रमणांविरोधात मोठी मोहीम; २६६ वाहनचालकांकडून ₹ २,०४,४०० दंड वसूल!
कोल्हापूर (कोटा न्यूज नेटवर्क) : कोल्हापूर शहर वाहतूक नियंत्रण शाखा आणि कोल्हापूर महानगरपालिका (KMC) अतिक्रमण पथक यांनी गुरुवारी, १३ नोव्हेंबर २०२५ रोजी शहरात वाहतुकीला अडथळा निर्माण करणाऱ्या दुकानदारांवर आणि बेशिस्त वाहनचालकांवर संयुक्तपणे विशेष ‘धडक’ मोहीम राबवली. या विशेष कारवाईमध्ये २६६ मोटार वाहनचालकांवर कारवाई करण्यात आली असून त्यांच्याकडून तब्बल २ लाख ४ हजार ४०० रुपये (₹ २,०४,४००/-) इतका दंड वसूल करण्यात आला आहे. शहरातील अनेक व्यापारी आणि दुकानदार आपले दुकानासमोर स्टँडिंग बोर्ड, पायाड (फूटपाथवर ठेवलेले साहित्य) आणि टेबल मांडून व्यवसाय करत होते. यामुळे पादचारी आणि रस्त्यावरील वाहतुकीला मोठा अडथळा निर्माण होत होता. पोलीस अधीक्षक आणि अपर पोलीस अधीक्षक यांच्या मार्गदर्शनाखाली सायंकाळी ६ ते ७ या वेळेत महत्त्वाच्या परिसरांमध्ये ही संयुक्त कारवाई करण्यात आली.
सीपीआर चौक ते महानगरपालिका, भवानी मंडप, जेलरोड, बिंदूचौक, मिलन हॉटेल परिसर. या कारवाईत २६ स्टँडिंग बोर्ड, १५ पायाड, ६ बाकडी (Seats), ४ टेबल, ३ चप्पल बॉक्स, साहित्य जप्त करण्यात आले या भागातील रस्त्याच्या कडेला अवैधरित्या पार्क करण्यात आलेली दुचाकी आणि चारचाकी वाहने क्रेन वाहनांद्वारे टोईंग करून कायदेशीर कारवाई करण्यात आली.
शहर वाहतूक नियंत्रण शाखेने शहरातील बेशिस्त पार्किंगवर नियंत्रण ठेवण्यासाठी स्वतंत्रपणे विशेष मोहीम राबवली. ही कारवाई दिवसातून दोन टप्प्यांत करण्यात आली. सकाळ ९ ते ११ (मलबार हॉटेल चौक, खानविलकर पेट्रोल पंप, गोखले कॉलेज चौक) सायंकाळ: ६ ते ७ (ताराराणी सिग्नल चौक, विवेकानंद कॉलेज परिसर आणि सायबर चौक) या मोहिमेदरम्यान, मोटार वाहन कायद्याचे उल्लंघन करणाऱ्या २६६ वाहन चालकांवर दंडात्मक कारवाई करून त्यांच्याकडून ₹ २,०४,४००/- इतका मोठा दंड वसूल करण्यात आला.
पोलीस निरीक्षक नंदकुमार मोरे यांच्या निरीक्षणाखाली ही कारवाई यशस्वी करण्यात आली. या मोहिमेसाठी वाहतूक शाखेचे अधिकारी आणि २५ पोलीस अंमलदार, २ पेट्रोलिंग बाईकवरील अंमलदार, ४ क्रेन वाहने, तसेच महानगरपालिकेचे अधिकारी व कर्मचारी यांनी सहभाग घेतला होता. पोलीस निरीक्षक नंदकुमार मोरे यांनी माहिती दिली की, बेशिस्त पार्किंगविरुद्धची ही मोहीम यापुढेही व्यापक स्वरूपात सुरूच राहणार आहे.
शहर वाहतूक नियंत्रण शाखेने सर्व नागरिक आणि वाहनचालकांना आवाहन केले आहे की, कायदेशीर कारवाई टाळण्यासाठी त्यांनी वाहतुकीचे नियम पाळावेत. बेशिस्त, दुहेरी पार्किंग करणे आणि रहदारीस अडथळा निर्माण होईल अशा पद्धतीने वाहने उभी करणे टाळावे. तसेच, पादचाऱ्यांना अडथळा निर्माण करणारे दुकानदार यांनीही आपले साहित्य रस्त्यावर ठेवू नये. नियमांचे उल्लंघन करणाऱ्यांवर कठोर कारवाई करण्यात येईल.
वाहतूक कोंडीवर नियंत्रण मिळवण्यासाठी, विशेषतः न्यायालयाच्या खंडपीठामुळे वाढलेल्या वर्दळीच्या ठिकाणी, हे नवीन नियम लागू करण्यात आले आहेत: भाऊसिंगजी रोडवर ‘एक दिवसाआड पार्किंग’ लागू करण्यात आले आहे. सम (Even) तारखांना: राजहंस प्रिंटिंग प्रेस ते महावीर कॉलेज चौक दरम्यान रस्त्याच्या पूर्व बाजूला चारचाकी वाहनांसाठी पार्किंगची सोय असेल. विषम (Odd) तारखांना: याच भागातील रस्त्याच्या पश्चिम बाजूला पार्किंग करता येईल. ‘नो पार्किंग’ झोन: सीपीआर चौक ते जैन बोर्डिंग हा महत्त्वाचा मार्ग ‘नो पार्किंग झोन’ म्हणून घोषित करण्यात आला आहे. अवजड वाहनांना प्रवेश बंदी: एसपी ऑफिस चौक ते सीपीआर चौक दरम्यान सकाळी ९ ते रात्री ८ वाजेपर्यंत खडी, वाळू आणि स्लॅब साहित्य घेऊन जाणाऱ्या डंपर आणि इतर अवजड वाहनांना प्रवेश बंद करण्यात आला आहे.
२०२५-२६ च्या गाळप हंगामापासून शहरात ऊस वाहतूक करणाऱ्या वाहनांसाठी कठोर नियम लागू करण्यात आले आहेत. वेळेचे बंधन: ऊस वाहनांना आता केवळ रात्री १० ते सकाळी ६ या वेळेतच शहरातून प्रवेश आणि वाहतूक करण्याची परवानगी असेल. दिवसा बंदी: दिवसा (सकाळी ६ ते रात्री १०) शहरांतर्गत रस्त्यांवर ऊस वाहतुकीस पूर्णपणे बंदी घालण्यात आली आहे. रिंग रोडचा वापर अनिवार्य: राजाराम साखर कारखान्याकडे जाणाऱ्या वाहनांसाठी विशेष मार्ग निश्चित केले आहेत, तर इतर सर्व साखर कारखान्यांकडे जाणारे ऊस वाहतूकदार वाहने शहरातील रिंग रोड वापरण्यास बांधील असतील. पोलीस निरीक्षक नंदकुमार मोरे यांनी स्पष्ट केले आहे की, शहरात सुरक्षित आणि सुरळीत वाहतूक राखणे हा या नियमांमागील मुख्य उद्देश आहे. तसेच हे सर्व नवीन वाहतूक नियम पोलीस निरीक्षक नंदकुमार मोरे यांच्या निरीक्षणाखालीच लागू करण्यात आले आहेत. त्यांच्या नेतृत्वाखालील वाहतूक शाखेने बेशिस्त पार्किंग आणि वाहतूक नियमांचे उल्लंघन करणाऱ्यांवर दंडात्मक कारवाईची मोहीम व्यापक स्वरूपात सुरू ठेवण्याचा इशारा दिला आहे. पुढील काळातही व्यापक कारवाईची मोहीम राबविण्यात येणार आहे, अशी माहिती त्यांनी दिली आहे.
या नवीन नियमांमुळे कोल्हापूरमधील वाहतूक कोंडीची समस्या कमी होण्यास आणि नागरिकांना अधिक सुरक्षित प्रवास करण्यास मदत होईल, अशी अपेक्षा आहे.
