समाज कल्याण कार्यालयात स्वच्छतेचा बोजवारा; तुंबलेली मुताऱ्या आणि नागरिकांची नाराजी
कोल्हापूर (प्रतिनिधी : बाळासो कांबळे): जिल्ह्याच्या कानाकोपऱ्यातून मोठ्या अपेक्षेने आणि विविध कामांसाठी कोल्हापूर येथील समाज कल्याण कार्यालय आणि सहाय्यक आयुक्त कार्यालय येथे येणाऱ्या सामान्य नागरिकांची मोठी गैरसोय होत असल्याची बाब समोर आली आहे. विशेषतः जात पडताळणी प्रमाणपत्र आणि इतर महत्त्वपूर्ण शासकीय कामांसाठी गावखेड्यातून येणाऱ्या लोकांच्या आरोग्याचा आणि सोयीचा प्रश्न ऐरणीवर आला आहे. याचे कारण म्हणजे कार्यालयाच्या आवारातील स्वच्छतेचा पूर्णपणे अभाव आणि तुंबलेली, दुर्गंधीयुक्त मूत्रालय (मुतारी). शुक्रवारी कार्यालयाच्या कामासाठी आलेल्या काही नागरिकांमध्ये अस्वच्छतेबद्दल कुजबुज सुरू होती. ही कुजबूज ऐकून एका जागरूक व्यक्तीने कार्यालयातील शौचालये आणि मूत्रालयाची पाहणी केली असता धक्कादायक चित्र दिसले. या व्यक्तीला मूत्रालय पूर्णपणे तुंबलेले आणि परिसरामध्ये असह्य दुर्गंधी पसरलेली आढळली.
समाज कल्याण विभाग हा अनेक जन कल्याणकारी कामे आणि विकासकामांना निधी पुरवणारा महत्त्वाचा विभाग आहे. परंतु, ज्या कार्यालयातून हजारो लोकांच्या कल्याणासाठी योजना राबविल्या जातात, त्याच ठिकाणी मूलभूत स्वच्छतेचा अभाव दिसल्याने आश्चर्य व्यक्त केले जात आहे. कामासाठी आलेल्या लोकांनी व्यक्त केलेली भावना सारखीच आहे: “जिल्हा स्तरावरील या महत्त्वाच्या कार्यालयातच जर स्वच्छतेकडे दुर्लक्ष होत असेल, तर ग्रामीण आणि इतर भागातील सरकारी कार्यालयांमध्ये नेमकी काय परिस्थिती असेल?” हा प्रश्न सध्या कोल्हापूरमधील नागरिकांना पडला आहे. दिवसभरात शेकडो नागरिक या ठिकाणी येत असतात. अशा ठिकाणी अस्वच्छता असणे म्हणजे रोगराईला आमंत्रण देण्यासारखे आहे. नागरिकांच्या मूलभूत गरजांमध्ये मोडणाऱ्या स्वच्छतेच्या प्रश्नाकडे प्रशासनाने केलेले दुर्लक्ष गंभीर असून, यावर तातडीने उपाययोजना करणे गरजेचे आहे. कार्यालयातील संबंधित अधिकारी व कर्मचाऱ्यांनी या गंभीर समस्येकडे त्वरित लक्ष देऊन मूत्रालय आणि शौचालयाची तात्काळ साफसफाई करावी आणि नियमित स्वच्छता राखावी, अशी मागणी नागरिकांनी केली आहे.
समाज कल्याण विभागाच्या उच्च अधिकाऱ्यांनी या प्रकरणाची दखल घेऊन स्वच्छतेच्या कामात हलगर्जीपणा करणाऱ्यांवर कारवाई करावी, अशी मागणी जोर धरू लागली आहे. जिल्हाधिकारी कार्यालयानेही या महत्त्वाच्या कार्यालयाच्या स्वच्छतेच्या दर्जाबाबत पाहणी करावी, अशी अपेक्षा व्यक्त होत आहे. या कार्यालयातील अस्वच्छतेमुळे नागरिकांना होणारा त्रास कधी थांबणार आणि प्रशासनाला कधी जाग येणार, याकडे आता सर्वांचे लक्ष लागले आहे.
