कोल्हापूर (सलीम शेख) : कोल्हापूर शहरातील ताराबाई पार्क परिसरात ११ नोव्हेंबर रोजी शिरलेल्या बिबट्याच्या घटनेत दाखवलेल्या शौर्याबद्दल शाहूपुरी पोलीस ठाण्याच्या टीमचा गौरव करण्यात आला. महावितरण कार्यालयाजवळ बिबट्या शिरल्याने नागरिकांमध्ये भीतीचे वातावरण निर्माण झाले होते. घटनेची माहिती मिळताच पोलीस निरीक्षक संतोष डोके हे फौजफाट्यासह घटनास्थळी दाखल झाले. नागरिकांना सुरक्षित स्थळी हलवून शोधमोहीम सुरू असताना बिबट्याने अचानक पोलीस अंमलदार कृष्णात पाटील यांच्यावर हल्ला केला. त्यांनी हातातील काठीने प्रतिकार करत स्वतः जखमी होऊनही मोठा अनर्थ टाळला. या धाडसी कामगिरीबद्दल पोलीस अधीक्षक योगेशकुमार गुप्ता यांच्या हस्ते शाहूपुरी पोलिसांचा सत्कार करण्यात आला. निरीक्षक संतोष डोके यांना वीस हजार रुपये रोख रक्कम व प्रशस्तीपत्र, तर अंमलदार कृष्णात पाटील यांना पंधरा हजार रुपये रोख रक्कम व प्रशस्तीपत्र देण्यात आले. गुप्ता यांनी पाटील यांचा ‘पोलीस दलातील टायगर’ असा गौरवपूर्ण उल्लेख केला. याशिवाय अंमलदार चंद्रशेखर लंबे, सरदार दिंडे, इंद्रजीत भोसले आणि अरुण कारंडे यांनाही प्रशस्तीपत्र देऊन सन्मानित करण्यात आले. कार्यक्रमाच्या सुरुवातीला पोलीस उपाधीक्षक तानाजी सावंत यांनी स्वागत करत शाहूपुरी पोलिसांच्या धाडसी कामगिरीचे कौतुक केले. यावेळी पोलीस उपअधीक्षक प्रिया पाटील उपस्थित होत्या. दरम्यान, बिबट्या शहरात कसा शिरला याचा तपास सुरू असून लवकरच माहिती दिली जाईल, असे पोलीस अधीक्षकांनी सांगितले.
