सार्वजनिक बांधकाम विभागाच्या दुर्लक्षामुळे रस्ते अपूर्ण; लवकरच ‘रास्ता रोको’, ‘न्यायालयीन लढा’ – सतिश माळगे!
राधानगरी (प्रतिनिधी : बाळासो कांबळे): सार्वजनिक बांधकाम विभाग (PWD) राधानगरी अंतर्गत येणाऱ्या जितेंद्रसिंह कंपनीच्या कामामुळे परिसरातील नागरिक त्रस्त झाले आहेत. कंपनीने २५ ऑक्टोबरपर्यंत पूर्ण करण्याचे आश्वासन दिलेले संपूर्ण रस्ते, संरक्षण कठडा आणि गटरची कामे अजूनही अपूर्णच असून, रस्त्यांची दुरवस्था कायम आहे. यामुळे रिपब्लिकन पार्टी ऑफ इंडिया (आठवले) पक्षाचे कोल्हापूर जिल्हा सचिव सतिश माळगे यांनी याविरोधात लवकरच रास्ता रोको आंदोलन आणि न्यायालयीन लढाई सुरू करण्याचा इशारा दिला आहे. निवेदनात सतिश माळगे यांनी निदर्शनास आणून दिले आहे की, निपाणी-फोंडा रोडवर पावसाळ्यानंतर जे खड्डे भरण्यात आले, ते केवळ दिशाभूल करणारे आहेत. आजपर्यंत जी काही कामे झाली, ती अत्यंत निकृष्ट दर्जाची असल्याने ती पूर्णपणे खराब झाली आहेत. या कामांमध्ये जितेंद्रसिंह कंपनीला साथ देणारे शासकीय अधिकारी सामील असल्यामुळे, या मनोमिलनातूनच रस्त्याची दुरवस्था झाल्याचा गंभीर आरोप माळगे यांनी केला आहे.
निपाणी ते मुधाळतिट्टा आणि गैबी तिट्टा ते फेजिवडे या भागात रस्त्यांपेक्षा खड्ड्यांची संख्या अधिक असल्याची विदारक परिस्थिती आहे. सुरुपली ते यमगे एसटी स्टँडपर्यंत तर पावसाळ्यानंतर चक्क चार वेळा खड्डे भरले, पण प्रवाशांना पुन्हा निराशाच मिळाली आहे. या निकृष्ट कामांना सा. बा. विभाग, राधानगरी यांच्या आशीर्वादाने नागरिकांचे हाल होत असल्याचा संताप माळगे यांनी व्यक्त केला.
या रस्त्याला न्याय न मिळाल्यास, रिपब्लिकन पार्टी ऑफ इंडिया (आठवले) पक्षाकडून तीव्र रास्ता रोको आंदोलन करण्यात येईल, असे सतिश माळगे यांनी वरिष्ठ अधिकार्यांना खडसावून सांगितले आहे. या गंभीर परिस्थितीत, एका अधिकाऱ्याने चक्क बदली का करून घेतली, हे समजायला तयार नाही, असा प्रश्न उपस्थित करत माळगे म्हणतात, “ज्यावेळी आपल्या काही गोष्टी अंगलट येतात, तेव्हा पर्याय शोधला जातो.” “पण काही झाले तरी, या रस्त्यावर अपघात झालेल्या नागरिकांना न्याय दिल्याशिवाय आम्ही स्वस्थ बसणार नाही.” – सतिश माळगे, जिल्हा सचिव, RPI (आठवले), कोल्हापूर रिपब्लिकन पक्षाने लिंगणूर (कागल तालुका) ते फेजिवडे (राधानगरी तालुका) पर्यंत अनेक लोकांशी संवाद साधला असून, प्रत्येक नागरिकाने स्पष्ट नाराजी आणि निषेध व्यक्त केला आहे. यावरून, आगामी काळात या रस्त्याच्या प्रश्नावर मोठे आंदोलन आणि न्यायालयीन लढा उभा राहणार हे निश्चित आहे.
