गोकुळ शिरगाव (इरफान मुल्ला) : कोल्हापूर विमानतळाच्या धावपट्टीचा विस्तार करण्यासाठी लक्ष्मिवाडी (ता. करवीर) येथील रहिवाशांचे विस्थापन करण्यात येणार आहे. विमानतळ विस्तारासाठी २,९०० मीटर लांबीची धावपट्टी वाढवण्याचा प्रस्ताव असून, यासाठी ६४ एकर भूसंपादन करण्याची प्रक्रिया सुरू झाली आहे.
विमानांतळ विकासाचा हा भाग असल्याने विस्थापित होणाऱ्या नागरिकांनी प्रशासनाला सहकार्य करण्याचे आवाहन करण्यात आले आहे. भूसंपादनामुळे रहिवाशांना त्रास होणार असला तरी, त्यांना पाणी, वीज, रस्ता व तात्काळ आर्थिक मोबदला अशा आवश्यक मूलभूत सुविधा पुरवल्या जातील, असे आश्वासन प्रशासनाने दिले आहे. लक्ष्मिवाडी येथील रहिवाशांनी, “आम्ही विकासाच्या विरोधात नाही, पण आम्हाला जगण्यासाठी आवश्यक असलेल्या सर्व नागरी सुविधा त्वरित मिळाल्या पाहिजेत,” अशी मागणी केली आहे.
विस्थापितांसाठी तात्काळ मोबदला, वीज कनेक्शन, कंपाऊंड, संडास, पाणी व घर बांधण्यासाठी यांसारख्या सुविधा उपलब्ध करून देण्याची मागणी होत आहे. दरम्यान, भूसंपादन कायद्यातील अडचणींमुळे मोबदल्याची सुमारे २९ टक्के रक्कम अडकली आहे, ज्यामुळे अनेक रहिवाशांना त्वरित निधी मिळण्यास विलंब होत आहे. सद्यस्थितीत, लक्ष्मिवाडीतील नागरिकांना मूलभूत सुविधा मिळाव्यात यासाठी सरकारने सर्वे क्रमांक ३२८ बी ची दोन गुंठे मंजूर झाल्याची माहिती समोर येत आहे. तसेच इतर सुविधा लवकर मिळाव्या अशी मागणी या रहीवाशांकडुन होत आहे.
