घातक इंजेक्शनची बेकायदेशीर विक्री रोखली; LCB ची कारवाई – ४० इंजेक्शन बॉटल्स जप्त!
कोल्हापूर (सलीम शेख) : कोल्हापूर जिल्ह्यातील अवैध इंजेक्शन विक्रीला आळा घालण्यासाठी पोलिसांनी सुरू केलेल्या विशेष मोहिमेमध्ये स्थानिक गुन्हे अन्वेषण शाखेने कारवाई करत घातक MEPHENTERMINE SULPHATE इंजेक्शनची बेकायदेशीर विक्री करणाऱ्या प्रशांत महादेव मोरे (वय ३५, रा. मोरेवाडी, ता. करवीर) याला ताब्यात घेतले. त्याच्याकडून ४० इंजेक्शन बॉटल्स आणि एकूण १,१०,००० रुपयांचा मुद्देमाल जप्त करण्यात आला आहे.
आगामी नगरपालिका व नगरपंचायत निवडणुकांच्या पार्श्वभूमीवर जिल्ह्यात अवैध व्यवसायांवर कारवाईचे आदेश वरिष्ठांकडून देण्यात आले होते. त्यानुसार LCB पथकाला सुभाषनगर साई मंदिर परिसरात एक व्यक्ती घातक इंजेक्शनची बेकायदेशीर विक्री करण्यासाठी येणार असल्याची गोपनीय माहिती मिळाली. पथकाने तेथे सापळा रचत संशयित व्यक्तीला ताब्यात घेतले.
त्याच्या दुचाकीची तपासणी केली असता डिकीत MEPHENTERMINE SULPHATEच्या ४० बॉटल्स आढळल्या. पंचासमक्ष सर्व कायदेशीर प्रक्रिया पूर्ण करून मुद्देमाल जप्त करण्यात आला. संबंधित प्रकरणी राजारामपुरी पोलिस ठाण्यात बी.एन.एस. कायद्यानुसार गुन्हा नोंदविण्यात आला असून पुढील तपास सुरू आहे. सदरची कारवाई वरिष्ठ अधिकाऱ्यांच्या मार्गदर्शनाखाली पोलीस निरीक्षक रविंद्र कळमकर,पोलीस उपनिरीक्षक संतोष गळवे,
अंमलदार शुभम संकपाळ, विशाल चौगले, लखनसिंह पाटील, विशाल खराडे, वैभव पाटील, संतोष बरगे, सागर माने, विजय इंगळे, महेश खोत, सागर चौगले, संदीप बेंद्रे, संजय कुंभार, महेश पाटील, योगेश गोसावी, अरविंद पाटील. यांनी केली.
