हातकणंगले (सलीम शेख : हातकणंगले तालुक्यातील हेरले माळभाग परिसरातील शेतात उघड्यावर सुरु असलेल्या जुगार खेळावर हातकणंगले पोलिसांनी कारवाई केली. या प्रकरणी आठ जणांविरुद्ध महाराष्ट्र जुगार बंदी कायदा कलम 12(अ) प्रमाणे गुन्हा दाखल करण्यात आला आहे.
मिळालेल्या माहितीनुसार, मंगळवार दिनांक 25 नोव्हेंबर 2025 रोजी दुपारच्या सुमारास, हेरले माळभाग येथील एका शेतात आंब्याच्या झाडाखाली उघड्यावर तीन पत्त्यांच्या खेळाद्वारे आर्थिक व्यवहार सुरू असल्याची माहिती पोलिसांना मिळाली. तक्रारीनुसार पोलिसांनी घटनास्थळी दाखल होत तपास केला. तपासादरम्यान पोलिसांना घटनास्थळावरून खालील साहित्य आढळून आले असून, पंचासमक्ष ते जप्त करण्यात आले.
जुगारासाठी वापरण्यात येणारी पत्त्यांची 52 पाने
एकूण 1,900/- रुपये रोकड,चार मोबाईल फोन,
तिन्ही वेगवेगळ्या दुचाकी (स्प्लेंडर, अॅक्टीव्हा, बॉक्सर – क्रमांकांसह),
विविध प्रकारच्या भारतीय चलनी नोटा,
जुगारासाठी वापरण्यात येणारी विविध 3-पानी पत्त्यांची संच एकूण जप्त साहित्याची किंमत अंदाजे 2,07,900/- रुपये इतकी असल्याचे पोलिसांनी सांगितले. तक्रारीनुसार या प्रकरणात आठ जणांविरुद्ध गुन्हा दाखल करण्यात आला असून, त्यांच्याकडून जप्त साहित्य पंचनाम्यात नोंदवण्यात आले आहे. पुढील तपास हातकणंगले पोलिसांकडून सुरू असून, वरिष्ठांच्या सूचनेनुसार संबंधित अधिकाऱ्याकडे तपास सोपवण्यात आला आहे. स्थानिक पातळीवर प्रतिबंधात्मक कारवाई आणि कायदा-सुव्यवस्था कायम राखण्यासाठी अशा प्रकारच्या उघड्या जुगारांवर नियमित तपासणी मोहीम सुरू असल्याचे पोलिसांनी सांगितले.
