तारदाळ (ता. हातकणंगले) : अल्पवयीन मुलींबाबत घडलेल्या एका संवेदनशील प्रकरणामुळे हातकणंगले तालुक्यात संतापाची लाट उसळली. या घटनेचा निषेध म्हणून तारदाळ ग्रामस्थांनी एकदिवसीय शांततापूर्ण बंद पाळला. कोणताही अनुचित प्रकार न घडता गाव बंद यशस्वीरीत्या पार पडला.
महात्मा ज्योतिराव फुले पुण्यतिथीच्या निमित्ताने ग्रामपंचायत कार्यालयात त्यांच्या प्रतिमेस पुष्पहार अर्पण करून निषेध-बंदची सुरुवात करण्यात आली. त्यानंतर छत्रपती शिवाजी महाराज चौकात ग्रामस्थांनी शांततेत निदर्शने केली.
तारदाळमधील सर्व व्यावसायिक, प्रतिष्ठान चालक आणि नागरिकांनी स्वयंस्फूर्तीने आपापले व्यवहार बंद ठेवत निषेधाला पूर्ण सहकार्य दिले. गाव बंददरम्यान कायदा व सुव्यवस्था अबाधित ठेवण्यासाठी शहापूर पोलिसांकडून विशेष सहकार्य मिळाले.
यावेळी तारदाळमधील मान्यवर मोठ्या संख्येने उपस्थित होते. त्यात — रमेश नर्मदे, दत्ता मांजरे तारदाळकर, सुनील शिंदे, दादासो सुतार, रंजीत पवार, नयन कांबळे, सूर्यकांत जाधव, नितीन खोचरे, प्रमोद परीट, दगडू कांबळे, प्रवीण केरले, मार्तंड कांबळे, विकास गायकवाड, गजानन पाटील, दिनकर थोरात आदींचा सहभाग होता.
गावातील सर्व तंटामुक्त समिती सदस्य, समाजसेवक, महिला व युवक मंडळांनी शांततेचा संदेश देत ही आंदोलनात्मक भूमिका घेतली. संपूर्ण आंदोलन संयमित, शिस्तबद्ध आणि कायदेशीर चौकटीत पार पडल्याची माहिती स्थानिक प्रशासनाकडून मिळाली.
