मुरगूड (बाळासो कांबळे ): आगामी सन २०२५ च्या मुरगूड नगरपरिषद निवडणुकीमुळे शहरातील राजकारण चांगलेच ढवळून निघाले असून, पारंपरिक गटबाजीचे समीकरण बदलल्याची जोरदार चर्चा नागरिकांमध्ये सुरू आहे. निवडणुकीसाठी सहा गट रिंगणात उतरले असून, त्यापैकी तीन गटांनी एकत्र येत राजकीय वातावरण तापवले आहे, तर उर्वरित तीन गटांच्या भूमिकेकडे आता साऱ्यांचे लक्ष लागले आहे.
मुरगूड नगरपरिषदेच्या निवडणुकीत सध्या संजय दादा मंडलिक गट, मुश्रीफ गट, राजे समरजितसिंह घाटगे गट, प्रविणसिंह पाटील गट, रणजितसिंह पाटील गट आणि राजेखान जमादार गट असे एकूण सहा गट कार्यरत आहेत.
मुश्रीफ गट; रणजितसिंह पाटील गट; राजेखान जमादार गट; या तीन गटांनी एकत्र येऊन निवडणूक लढवण्याची तयारी दर्शवल्याने मुरगूडचे राजकीय चित्र पूर्णपणे पालटले आहे. या एकत्रित ताकदीमुळे उर्वरित गटांसमोर मोठे आव्हान उभे राहिले आहे. एका बाजूला तीन गट एकत्र आले असताना, आता शहरातील नागरिकांमध्ये चर्चा रंगली आहे ती म्हणजे – मंडलिक गट, प्रविणसिंह पाटील गट व राजे समरजितसिंह घाटगे गट हे तीन गट एकत्र येऊन लढणार की स्वबळावर?
हे तिन्ही गट एकत्र आल्यास निवडणुकीत खरी रंगत येईल, असे स्थानिक नागरिकांचे मत आहे. मात्र, या गटांतील वरिष्ठ नेत्यांकडून सध्या तरी ‘स्वबळावर’ लढण्याचा नारा देण्यात येत आहे, ज्यामुळे उमेदवारांमध्ये संभ्रमाचे वातावरण आहे. एकत्रित येण्याबाबत वरिष्ठांकडून अद्याप ‘ग्रीन सिग्नल’ मिळालेला नाही.
नागरिकांच्या अंदाजानुसार, हे तिन्ही गट निवडणुकीत एकत्र येतील अशी शक्यता व्यक्त होत आहे, पण वरिष्ठ नेत्यांचा “नगराध्यक्ष पद आमच्या गटाचाच असेल” हा पवित्रा युतीच्या शक्यता कमी करत आहे. गटात काम करणाऱ्या इच्छुक उमेदवारांची संख्या मोठ्या प्रमाणात वाढली आहे. त्यामुळे, जर नागरिकांच्या चर्चेनुसार हे तीन गट (मंडलिक, पाटील, घाटगे) एकत्र आले, तर इच्छूक उमेदवारांची ‘डोकेदुखी’ वाढणार आहे.
ज्या वॉर्डातून उमेदवारीची अपेक्षा आहे, तेथे तिकीट मिळेलच याची शाश्वती नाही.
प्रत्येक वॉर्डात जास्त उमेदवार असल्याने, कोणाचा ‘पत्ता कट’ करायचा हा मोठा पेच तिन्ही गटातील वरिष्ठ नेत्यांसमोर निर्माण होणार आहे. या पार्श्वभूमीवर, ‘वरिष्ठ जो निर्णय घेतील तो अंतिम राहील’ आणि ‘एकजुटीने निवडणूक जिंकू’ असा संदेश वॉर्डातील सभांमधून दिला जात आहे. त्यामुळे सध्या ‘तेरी भी चूप, मेरी भी चूप’ असा सावध पवित्रा घेत वरिष्ठ नेते पुढे जात असल्याचे चित्र आहे.
या निवडणुकीत पक्षीय राजकारण बाजूला ठेवून गटा-गटांमध्येच ईर्षा रंगणार असून, मुरगूडच्या इतिहासातील ही पहिलीच निवडणूक असेल, जिथे गटबाजी अत्यंत अटीतटीची असेल. चौरंगी होणार? (सहा गट स्वतंत्र लढल्यास); तिरंगी होणार? (दोन गटांची युती विरुद्ध मंडलिक, पाटील, घाटगे गट स्वबळावर); दुरंगी होणार? (दोन आघाड्यांमध्ये लढत)
समजा, जर तिरंगी निवडणूक झाली, तर नगराध्यक्षपदाचे तीन उमेदवार आणि किमान साठ नगरसेवक रिंगणात उतरतील, शिवाय अपक्षांची संख्या वेगळी असेल. त्यामुळे ही निवडणूक अत्यंत अटीतटीची आणि रंगतदार होणार असून, “जो जीता वही सिकंदर” असे म्हणावे लागणार आहे.
