सूर्यवंशी-मांगोरे कॉलनीचा 35 वर्षांचा विकासाचा ओढा: नागरिकांचा ‘मतदान नाही’चा एल्गार!
मुरगूड: (बाळासो कांबळे): मुरगूड शहरातील सूर्यवंशी/मांगोरे कॉलनी येथील रहिवासी गेल्या ३५ वर्षांपासून मूलभूत नागरी सुविधांपासून वंचित आहेत. रस्ते, गटार आणि स्वच्छतेसारख्या प्राथमिक सोयीसुविधांचा पूर्णपणे अभाव असूनही नगरपरिषद प्रशासनाकडून सातत्याने दुर्लक्ष होत असल्याने नाराज नागरिकांनी आगामी निवडणुकीवर बहिष्कार टाकण्याचा कठोर निर्णय घेतला आहे. कॉलनीच्या प्रवेशद्वारावर नागरिकांनी “रस्ता नाही, गटर नाही, स्वच्छता नाही, विकास नाही, त्यामुळे मतदान नाही” असा स्पष्ट इशारा देणारा बोर्ड लावला आहे. निवडणुकीच्या तोंडावर लावलेला हा बोर्ड ये-जा करणाऱ्या प्रत्येकाचे लक्ष वेधून घेत असून, मुरगूड शहराच्या राजकारणात सध्या याच बोर्डाची जोरदार चर्चा सुरू आहे.
कॉलनीतील रहिवाशांनी दिलेल्या माहितीनुसार, येथील रस्ते (सर्व्हे क्रमांक ५१४/ब/१, ५६५/ब/५ व ६) नगरपरिषदेकडे अधिकृतपणे वर्ग झालेले आहेत. असे असूनही नगरपरिषद या रस्त्यांकडे पूर्णपणे दुर्लक्ष करत आहे. याहीपेक्षा गंभीर बाब म्हणजे, मुरगूड शहर विकास आराखड्यामध्ये या कॉलनीतून १५ मीटरचा डी.पी. (Development Plan) रोड मंजूर झालेला असतानाही तो वर्ग करून घेतला जात नाहीये. सूर्यवंशी/मांगोरे कॉलनी एन.ए. (Non-Agricultural) झालेली असूनही तिला सोयीसुविधांपासून जाणीवपूर्वक वंचित ठेवले जात असल्याचा गंभीर आरोप येथील रहिवाशांनी केला आहे. प्रशासकीय स्तरावर काही विशिष्ट अंतदृष्टस्थ हेतू पुरस्कर दृष्टीने ही विकासकामे थांबवण्यात आल्याची भावना नागरिकांमध्ये आहे. नागरिकांनी निवडणुकीचे माध्यम वापरून प्रशासनाचे आणि लोकप्रतिनिधींचे लक्ष वेधले आहे. जोपर्यंत आमच्या मूलभूत समस्या सुटत नाहीत, तोपर्यंत मतदानाचा बहिष्कार कायम राहील, असा स्पष्ट इशारा त्यांनी दिला आहे. आता मुरगूड नगर परिषद प्रशासन आणि लोकप्रतिनिधी या संतप्त नागरिकांच्या समस्यांची दखल घेऊन त्या सोडवतात का, याकडे संपूर्ण मुरगूड शहरातील नागरिकांचे लक्ष लागून राहिले आहे.
