मुरगूडमध्ये विकास कसा करायचा, हे निवडून आल्यावर प्रत्यक्ष दाखवणार: उमेदवार सत्यजितसिंह पाटील!
मुरगूड (प्रतिनिधी : बाळासो कांबळे) : मुरगूड नगरपालिकेच्या पंचवार्षिक निवडणुकीच्या निमित्ताने, प्रभाग क्रमांक ६ मधील नगरसेवक पदाचे उमेदवार सत्यजितसिंह अजितसिंह पाटील यांनी आपले जाहीर मत व्यक्त केले आहे. निवडून आल्यास मुरगूड शहराला राज्यात प्रथम क्रमांकाचे शहर बनवण्याचा आपला प्रयत्न राहील, असे आश्वासन त्यांनी दिले आहे.
कै. अजितसिंह पाटील व कै. दिलीपसिंह पाटील यांचे स्वप्न पूर्ण करण्याचा आपला मनोदय असून, त्यासाठी जनतेने आपल्याला नगरसेवक पदाची संधी द्यावी, अशी विनंती सत्यजितसिंह पाटील यांनी केली आहे. सत्यजितसिंह पाटील हे शिवसेना (शिंदे गट) आणि भारतीय जनता पार्टी (भाजप) युतीचे अधिकृत उमेदवार आहेत. ते भाजपचे नेते आणि माजी नगराध्यक्ष प्रविणसिंह पाटील यांच्या नेतृत्वाखाली, तसेच शिवसेना नेते माजी खासदार संजयदादा मंडलिक यांच्या मार्गदर्शनाखाली निवडणूक लढवत आहेत. सहकार महर्षी विश्वनाथराव पाटील यांचा राजकीय वारसा सत्यजितसिंह पाटील यांना लाभला आहे. त्यांचे आजोबा विश्वनाथराव पाटील यांनी ३० ते ३५ वर्षे मुरगूड नगरपालिकेचे नगराध्यक्षपद भूषवले होते. तसेच, ते बिद्री सहकारी साखर कारखान्याचे चेअरमन आणि शेतकरी संघाचे अध्यक्ष होते. “लहानपणापासूनच आजोबांच्या सानिध्यात राहण्याचा योग आल्यामुळे, त्यांच्या आचार-विचारांचे संस्कार आणि राजकारणाचे बाळकडू मला मिळाले आहे,” असे सत्यजितसिंह पाटील यांनी सांगितले.
मुरगूड येथील लाल आखाडा संकुल आणि साई आखाडा येथील मल्लांसाठी विशेष सुविधा उपलब्ध करून देण्यावर त्यांचा भर असेल. पैलवानांसाठी अद्ययावत प्रशिक्षण केंद्र उभारण्याचा संकल्प सत्यजितसिंह पाटील यांनी बोलून दाखवला आहे. महाराष्ट्र राज्याचे उच्च व तंत्र शिक्षण मंत्री चंद्रकांत दादा पाटील यांच्या मार्गदर्शनाखाली, मल्लांसाठी वर्षातून एकदा उन्हाळी शिबिर आयोजित करण्याचा मानस त्यांनी व्यक्त केला आहे. मुरगूडच्या विकासासाठी पर्यटन आणि युवा पिढीला रोजगार देण्यासाठी विशेष प्रयत्न केले जातील, असे आश्वासन त्यांनी दिले.
मुरगूडची अंबाबाई आणि आदमापूरचे बाळूमामा यांच्या आशीर्वादाने मुरगूडला एकत्रित पर्यटन स्थळ म्हणून प्राधान्य देण्याचा त्यांचा मानस आहे. युवा पिढीला व्यसनमुक्त ठेवण्यासाठी आणि युवकांना स्वतंत्र उद्योग सुरू करण्यासाठी मदत करण्याचे आश्वासन त्यांनी दिले आहे. गावातील बेरोजगार मुलांना उद्योगांबरोबरच गरीब, गरजू, होतकरू व हुशार मुलांना शैक्षणिक कामात मदत करण्याची त्यांच्या घराण्याची परंपरा पुढे चालू ठेवणार असल्याचे त्यांनी सांगितले. मुरगूड शहर स्वच्छ आणि सुंदर करण्यासाठी नगराध्यक्ष पदासाठी निवडणूक लढवत असलेल्या सुहासिनीदेवी पाटील यांना आपले पूर्ण सहकार्य राहील, असे त्यांनी स्पष्ट केले. “नगरसेवक पदाची संधी द्या, शिवसेना शिंदे गट आणि भाजप आघाडीला विजयी करा. लहानथोरांच्या व युवकांच्या पसंतीत उतरलेला उगवता नेतृत्व सत्यजित पाटील (आबा) हा खरोखरच प्रामाणिक नेतृत्व आहे,” असे आवाहन त्यांच्या समर्थकांनी केले आहे.
