राधानगरी (सलीम शेख ) : राधानगरी तालुक्यातील केळोशी बु. पैकी पिलावरवाडी येथे आज सकाळी वन्य प्राण्याच्या हल्ल्याची घटना घडली आहे. आनंदा शामराव डकरे हे शेतकरी आपल्या चार म्हशींसह सकाळी सुमारे आठ वाजण्याच्या सुमारास शेताकडे जात असताना जांभळीच्या पाणी परिसरात दबा धरून बसलेल्या गव्वाने (वनगवा) अचानक हल्ला चढवला. या हल्ल्यात एका म्हशीला गंभीर दुखापत झाली आहे.
स्थानिक नागरिकांच्या मदतीने जखमी म्हैस वाचवण्यात आली असून, या घटनेमुळे परिसरातील शेतकरी व ग्रामस्थांत भीतीचे वातावरण निर्माण झाले आहे.
या भागात गेल्या काही महिन्यांपासून वन्य प्राण्यांच्या—विशेषतः गव्वांच्या—हल्यांच्या घटना वाढत आहेत. दुभत्या जनावरांवर आणि काही वेळा नागरिकांवरही हल्ल्यांच्या घटना नोंदवल्या गेल्या आहेत. त्यामुळे नागरिकांत संताप व्यक्त होत असून, वनविभागाने तातडीने प्रभावी उपाययोजना करावी, अशी मागणी ग्रामस्थांनी केली आहे.
घटनास्थळी वनपाल संग्राम जितकर, माजी उपसरपंच राहुल पिलावरे, नंदकुमार खराडे, जैनुल जमादार, जोतीराम कवडे, मनोज ढोणे आदींनी भेट देऊन पाहणी केली.
वनपाल संग्राम जितकर यांनी सांगितले की,
“गव्वाच्या हल्यात जखमी झालेल्या दुभत्या म्हशीचा पंचनामा करण्यात आला असून, शेतकऱ्याला शासन नियमांनुसार नुकसानभरपाई देण्यात येईल.”
दरम्यान, माजी उपसरपंच राहुल पिलावरे यांनी सांगितले की,
“या भागातील गरीब शेतकरी वर्ग दुग्धव्यवसायावर आपले कुटुंब चालवत आहे. परंतु अशा वारंवार हल्ल्यांमुळे शेतकरी आर्थिक संकटात सापडत आहेत. त्यामुळे वनविभागाने तातडीने ठोस पावले उचलावीत.”
ग्रामीण भागातील नागरिकांनी या घटनांमुळे वन्यजीवांपासून संरक्षणासाठी कुंपण व्यवस्था, रात्री गस्त आणि तत्काळ प्रतिसाद पथक स्थापन करण्याची मागणी केली आहे.
