साताऱ्यात खळबळ: महिला आरक्षित जागेवर पुरुषाचा अर्ज वैध ठरल्याने निवडणूक आयोगावर प्रश्नचिन्ह!
सातारा (प्रतिनिधी) : सातारा नगरपालिकेच्या आगामी निवडणुकीत एका धक्कादायक घटनेने राजकीय वर्तुळात मोठी खळबळ उडाली आहे. प्रभाग क्रमांक तीन, ‘३ ब’ हा सर्वसाधारण महिला प्रवर्गासाठी आरक्षित असताना, चक्क एका पुरुषाने या जागेसाठी आपला नामनिर्देशन अर्ज दाखल केला आहे. विशेष म्हणजे, निवडणूक छाननीमध्ये (Scrutiny) हा अर्ज वैध (Valid) ठरवण्यात आल्याने निवडणूक आयोगाच्या कार्यपद्धतीवरच गंभीर प्रश्नचिन्ह निर्माण झाले आहे. सातारा नगरपालिकेच्या प्रभाग क्रमांक ३ ब (सर्वसाधारण महिला) साठी एकूण ७ उमेदवारी अर्ज दाखल झाले होते. त्यापैकी ६ महिला उमेदवारांचे आणि एका पुरुषाचे अर्ज होते. महिलांसाठी आरक्षित असलेल्या या जागेवर पुरुषाचा अर्ज स्वीकारला जाणे ही बाब अत्यंत गंभीर मानली जात आहे. याहूनही धक्कादायक म्हणजे, सर्व उमेदवारांच्या अर्जांची छाननी (Scrutiny) झाल्यानंतरही निवडणूक अधिकाऱ्यांच्या (Election Officer) हे लक्षात आले नाही की, हा अर्ज नियमांनुसार अवैध आहे. भारतीय जनता पक्षाचे (भाजप) माजी शहराध्यक्ष आणि नगरपालिका प्रभारी यांनी हा प्रकार उघडकीस आणला. त्यांनी तातडीने या प्रकरणाची माहिती निवडणूक अधिकाऱ्यांना दिली. “महिलांसाठी आरक्षित जागेत पुरुष उमेदवाराचा अर्ज वैध ठरत असताना निवडणूक अधिकारी काय करत होते?” असा संतप्त सवाल त्यांनी उपस्थित केला आहे. या प्रकारामुळे निवडणूक आयोगाच्या निष्काळजीपणावर गंभीर आरोप होत आहेत.
राज्यातील २४६ नगरपालिका, ४२ नगरपंचायतींसह विविध स्थानिक स्वराज्य संस्थांच्या निवडणुकीच्या पार्श्वभूमीवर सध्या राजकीय वातावरण तापले आहे. सर्वच पक्षांच्या नेत्यांनी निवडणुकीची तयारी सुरू केली आहे. अर्ज भरण्याची मुदत संपली असून, छाननी प्रक्रिया सुरू आहे. या प्रक्रियेतच साताऱ्यातील हा प्रकार समोर आल्याने गोंधळाचे वातावरण निर्माण झाले आहे. या निवडणुकीसाठी २ डिसेंबरला मतदान होणार आहे, तर मतमोजणी आणि निकाल ३ डिसेंबर रोजी जाहीर होईल.
महिलेसाठी राखीव असलेल्या जागेवर पुरुषाचा अर्ज स्वीकारला जाणे आणि तो वैध ठरवणे हा प्रकार महिला आरक्षणाच्या कायदेशीर प्रक्रियेवरच प्रश्नचिन्ह निर्माण करणारा आहे. या घटनेमुळे राज्यभरातील इतर ठिकाणीही आरक्षणासंदर्भात अशी काही अनियमितता झाली आहे का, याबाबत शंका निर्माण झाली आहे. आता निवडणूक अधिकारी आणि संबंधित यंत्रणांना या प्रकरणावर स्पष्टीकरण द्यावे लागणार आहे. तसेच, भविष्यात अशा चुका टाळण्यासाठी काय उपाययोजना केल्या जातात, याकडे सर्वांचे लक्ष लागले आहे. या प्रकरणामुळे साताऱ्याच्या राजकारणात सध्या तीव्र चर्चा सुरू आहे.
