वडगाव (सलीम शेख): वडगाव नगरपरिषद सार्वत्रिक निवडणूक २०२५ च्या पार्श्वभूमीवर, येथील कृषी उत्पन्न बाजार समितीने एक महत्त्वपूर्ण निर्णय घेतला आहे. दर सोमवारी भरणारा साप्ताहिक जनावरे व शेळ्या-मेंढ्यांचा बाजार केवळ एका दिवसासाठी बदलण्यात आला आहे. वडगाव (पेठ), ता. हातकणंगले येथील वडगाव शेती उत्पन्न बाजार समितीने सर्व शेतकरी, व्यापारी आणि खरेदीदारांसाठी एक जाहीर सूचना जारी केली आहे.
बाजार समितीने दिलेल्या माहितीनुसार, मूळ बाजाराची तारीख सोमवार, दि. ०१/१२/२०२५ ती बदलून बाजाराची तारीख रविवार, दि. ३०/११/२०२५ रोजी भरविण्यात येईल. सोमवार, १ डिसेंबर २०२५ रोजी भरणारा जनावरे व शेळ्या-मेंढ्यांचा आठवडी बाजार आता एक दिवस आधी म्हणजेच रविवार, ३० नोव्हेंबर २०२५ रोजी भरविण्यात येईल. बाजार समितीचे सचिव ज. शिंदे यांनी पत्रकाद्वारे या बदलाची माहिती दिली. वडगाव नगरपरिषद सार्वत्रिक निवडणूक २०२५ च्या कामकाजाला कोणताही अडथळा येऊ नये आणि कायदा व सुव्यवस्थेच्या दृष्टीने हा बदल करण्यात आल्याचे त्यांनी स्पष्ट केले आहे.
निवडणुकीच्या काळात प्रशासकीय व्यवस्था व पोलीस यंत्रणा निवडणुकीच्या कामात व्यस्त असल्याने, बाजारात होणारी गर्दी टाळण्यासाठी बाजार समितीने हा निर्णय घेतला आहे. “सर्व शेतकरी बांधव, व्यापारी आणि खरेदीदारांनी बाजार समितीच्या या बदलाची नोंद घ्यावी आणि प्रशासनाला सक्रिय सहकार्य करावे,” असे आवाहन सचिव ज. शिंदे यांनी केले आहे. हा बदल फक्त एका आठवड्यासाठी लागू राहील. पुढील आठवड्यापासून बाजार नेहमीप्रमाणे सोमवार, दि. ०८/१२/२०२५ रोजी भरेल.
