हातकणंगले (प्रतिनिधी): लग्नाचे प्रलोभन दाखवून एका तरुणीवर वारंवार शारीरिक अत्याचार केल्याची धक्कादायक घटना हातकणंगले येथे उघडकीस आली आहे. लग्नाचे खोटे आश्वासन देऊन विविध ठिकाणी नेऊन पीडितेचे लैंगिक शोषण केल्याप्रकरणी हातकणंगले पोलिसांनी संशयित आरोपी बुद्धभूषण बाणेदार याच्यावर गुन्हा दाखल केला आहे. मिळालेल्या माहितीनुसार, हा अत्याचाराचा प्रकार मे २०२४ पासून सुरू होता. आरोपीने पीडित तरुणीला लग्नाचे आमिष दाखवून विश्वासात घेतले. त्यानंतर त्याने तिला कोल्हापूर, गगनबावडा आणि सौंदत्ती यांसारख्या विविध ठिकाणच्या लॉजवर नेऊन तिच्या इच्छेविरुद्ध शरीरसंबंध ठेवले. तक्रारीत नमूद केल्यानुसार, आरोपीने पीडितेला: हॉटेल पॉइजन, शिवा रेसिडेन्सी लॉज (गगनबावडा), हॉटेल गोविंदा (कोल्हापूर), सौंदत्ती (कर्नाटक) यांसह अनेक ठिकाणी नेऊन अत्याचार केला. अगदी अलीकडे, १७ एप्रिल २०२५ रोजी सुद्धा आरोपीने अशाच प्रकारे पीडितेशी जबरदस्तीने संबंध ठेवल्याचे समोर आले आहे.
वारंवार होणाऱ्या या त्रासाला कंटाळून आणि लग्नाचे आश्वासन पाळले जात नसल्याचे लक्षात आल्यानंतर, पीडित महिलेने ८ डिसेंबर २०२५ रोजी रात्री ११ वाजण्याच्या सुमारास हातकणंगले पोलीस ठाणे गाठले. पीडितेने दिलेल्या सविस्तर फिर्यादीवरून पोलिसांनी संशयित आरोपी बुद्धभूषण बाणेदार याच्याविरुद्ध संबंधित कलमान्वये गुन्हा नोंदवला आहे. हातकणंगले पोलिसांनी या प्रकरणाची गंभीर दखल घेतली असून गुन्हा दाखल होताच तपासाची चक्रे फिरवली आहेत. या प्रकरणाचा पुढील तपास पोलीस अधिकाऱ्यांच्या मार्गदर्शनाखाली सुरू असून, आरोपीवर कायदेशीर कारवाईची प्रक्रिया राबवली जात आहे. या घटनेमुळे परिसरात खळबळ उडाली असून, महिलांवरील वाढत्या अत्याचाराच्या घटनांबाबत संताप व्यक्त केला जात आहे.
