लातूरमध्ये काँग्रेसचा ‘हात’ जोरात; भाजपचा गड ढासळला, ‘वंचित’ची निर्णायक साथ!

लातूर | १६ जानेवारी २०२६: लातूर महानगरपालिकेच्या ७० जागांसाठी झालेल्या अटीतटीच्या निवडणुकीत अखेर भारतीय राष्ट्रीय काँग्रेसने दणदणीत विजय मिळवला आहे. आमदार अमित देशमुख यांच्या नेतृत्वाखाली काँग्रेसने स्वबळावर बहुमताचा आकडा पार केला असून, एकूण ७० जागांपैकी ४३ जागा जिंकून पालिकेवर एकहाती सत्ता मिळवली आहे. भाजपला केवळ २२ जागांवर समाधान मानावे लागले आहे.

अंतिम निकाल आकडेवारी (एकूण ७० जागा)

विलासराव देशमुख यांच्या निधनानंतरही लातूर शहरावर देशमुख कुटुंबाची असलेली पकड या निकालाने पुन्हा एकदा सिद्ध केली आहे. आमदार अमित देशमुख आणि धिरज देशमुख यांच्या नियोजनापुढे भाजपची रणनीती सपशेल अपयशी ठरली. निवडणुकीच्या प्रचारादरम्यान भाजप प्रदेशाध्यक्ष रवींद्र चव्हाण यांनी दिवंगत विलासराव देशमुख यांच्याबद्दल केलेल्या एका वादग्रस्त विधानाचा मोठा फटका भाजपला बसला. लातूरच्या जनतेने या विधानाचा निषेध मतपेटीतून केल्याचे राजकीय विश्लेषकांचे मत आहे. या निवडणुकीत काँग्रेस आणि वंचित बहुजन आघाडीची अप्रत्यक्ष युती किंवा ‘अंडरस्टँडिंग’ पाहायला मिळाली. वंचितने ४ जागा जिंकल्या असल्या तरी, अनेक प्रभागांत त्यांनी भाजपच्या हक्काच्या मतांना खिंडार पाडल्याने काँग्रेसचा विजय सुकर झाला.

• काँग्रेसच्या पहिल्या महापौर स्मिता खानापुरे यांचा भाजपच्या प्रेरणा होनराव यांनी पराभव केला.

• माजी महापौर विक्रांत गोजमगुंडे (जे काँग्रेस सोडून राष्ट्रवादीत गेले होते) त्यांनी निसटता विजय मिळवला.

• माजी महापौर दीपक सूळ यांनी आपला प्रभाग राखण्यात यश मिळवले.

लातूर शहरातील अंतर्गत रस्ते, पाणीपुरवठा आणि स्थानिक अस्मितेचा मुद्दा काँग्रेसने प्रभावीपणे मांडला. तसेच, महायुतीमधील अंतर्गत विसंवाद आणि बंडखोरीचा फायदाही काँग्रेसला मिळाला. लातूर महानगरपालिकेत आता काँग्रेसचा महापौर बसणार हे स्पष्ट झाले आहे. या विजयामुळे मराठवाड्यातील काँग्रेसच्या कार्यकर्त्यांमध्ये नवे चैतन्य निर्माण झाले आहे.