मुरगूडमधील १३५ कुटुंबांचे ‘घरकुल’ स्वप्न धूसर; भाड्याच्या ओझ्याखाली दबतेय गरिबांचे शिक्षण अन् पोट!
मुरगूड (प्रतिनिधी : बाळासो कांबळे): “स्वतःच्या हक्काचं छप्पर असावं” हे प्रत्येक सामान्य माणसाचं स्वप्न असतं. मात्र, मुरगूड शहरात आजही १३५ अशी कुटुंबं आहेत, ज्यांच्या नशिबी केवळ भाड्याची खोली आणि घरासाठीची वणवण उरली आहे. वाढत्या महागाईत घराचं भाडं भरावं की मुलांचं शिक्षण करावं, अशा दुहेरी कात्रीत ही कुटुंबं अडकली असून, “आम्हाला घर कधी मिळणार?” असा आर्त सवाल ही कुटुंबं प्रशासनाला विचारत आहेत.
हातावरचे पोट आणि भाड्याचा अवाढव्य डोंगर, मुरगूड शहरातील हे १३५ लाभार्थी प्रामुख्याने कष्टकरी, मजूर आणि रोजंदारीवर जगणारे आहेत. दिवसाकाठी पडेल ते काम करून कुटुंबाचा उदरनिर्वाह करणे हेच त्यांच्यापुढील मोठे आव्हान आहे. शहरात घरांच्या भाड्याचे दर गगनाला भिडले आहेत. उत्पन्नाचा मोठा हिस्सा घरमालकाच्या हातात द्यावा लागत असल्याने, या कुटुंबांना दोन वेळच्या अन्नाची भ्रांत निर्माण झाली आहे. शिक्षणावर पडतेय संक्रांत! भाड्याच्या घरात राहणाऱ्या एका लाभार्थ्याने आपली व्यथा मांडताना सांगितले की, “महिन्याकाठी कमाई तुटपुंजी आहे. त्यात घराचं भाडं दिलं तर मुलांच्या शाळेची फी भरायला पैसे उरत नाहीत. भाडं द्यावं तर पोटाला चिमटा घ्यावा लागतो आणि न द्यावं तर घरमालक घर खाली करायला लावतात.” या भीषण परिस्थितीमुळे या कुटुंबातील मुलांच्या शिक्षणाचे भवितव्य टांगणीला लागले आहे. मुरगूड नगरपरिषदेकडे वारंवार विनंत्या करूनही या १३५ लाभार्थ्यांच्या घरांचा प्रश्न अद्याप मार्गी लागलेला नाही. ‘सर्वांसाठी घरे’ या शासनाच्या घोषणा केवळ कागदावरच आहेत का? असा प्रश्न आता उपस्थित होत आहे. हक्काच्या घरासाठी पात्र असूनही या लाभार्थ्यांना वर्षानुवर्षे प्रतीक्षेत ठेवणे हा त्यांच्या हक्कावर गदा आणण्याचाच प्रकार आहे.
(१) एकूण वंचित लाभार्थी: १३५ कुटुंबं. (२) वाढीव घरभाडे, मुलांच्या शिक्षणाचे नुकसान, कुपोषणजन्य. (३) हक्काची जागा आणि घरकुलासाठी तत्काळ निधीची उपलब्धता. मुरगूडमधील या १३५ कुटुंबांची परिस्थिती आता हाताबाहेर जात आहे. जर शासनाने आणि मुरगूड नगरपरिषद प्रशासनाने याकडे तातडीने लक्ष देऊन घरकुलांचा प्रश्न निकाली काढला नाही, तर हे सर्व लाभार्थी आपल्या मुलाबाळांसह रस्त्यावर उतरून तीव्र आंदोलन छेडण्याच्या तयारीत आहेत. मुरगूड नगरपरिषद घरापासून वंचित असलेल्या गरीब लाभार्थ्यांच्याकडे लक्ष देणार का? याकडे पूर्ण तालुक्याचे लक्ष लागून राहिले आहे.
