ढोल-ताशांच्या गजरात आणि लेझीमच्या तालावर चिमुकल्यांचे स्वागत; गुढीपाडव्याचा मुहूर्त साधत २३ विद्यार्थ्यांचा शाळाप्रवेश
चिमगांव (बाळासो कांबळे): गुढीपाडव्याच्या शुभ मुहूर्तावर येथील शाळेत नवीन शैक्षणिक वर्षाचा प्रारंभ अत्यंत उत्साहात करण्यात आला. लेझीमच्या पारंपारिक वाद्यांच्या गजरात, साखर-पेढे आणि पुष्पगुच्छ देऊन नवीन प्रवेशित विद्यार्थ्यांचे व त्यांच्या पालकांचे जंगी स्वागत करण्यात आले. यंदा इयत्ता पहिलीमध्ये २३ मुलांनी आपला पहिला पाऊल शाळेत ठेवले. वर्षाच्या पहिल्या दिवशी शाळेचा परिसर सुशोभित करण्यात आला होता. गावातून वाजत-गाजत काढण्यात आलेल्या मिरवणुकीने वातावरणात चैतन्य निर्माण केले. शाळेच्या वतीने प्रत्येक विद्यार्थ्याला आणि पालकाला साखर-पेढे देऊन त्यांचे तोंड गोड करण्यात आले, तर पुष्पगुच्छ देऊन त्यांचे शैक्षणिक स्वागत करण्यात आले. या सोहळ्याचे औचित्य साधून नूतन पंचायत समिती सदस्या रूपाली दीपक अंगज यांचा विशेष सत्कार समारंभ आयोजित करण्यात आला होता. शालेय शिक्षण कमिटीच्या अध्यक्षा पूजा अंगज आणि ग्रामस्थांच्या उपस्थितीत हा सोहळा पार पडला. या कार्यक्रमाला गावातील राजकीय आणि सामाजिक क्षेत्रातील अनेक दिग्गज उपस्थित होते.
यामध्ये प्रमुख उपस्थिती: सरपंच दीपक अंगज, विधानसभा संघटक मारुती पुरी बुवा, विश्वास चौगुले. ग्रामपंचायत सदस्य: सागर भोई, रूपाली पुरी बुवा. शालेय शिक्षण कमिटी: अध्यक्ष पूजा अंगज, सदस्य अजित अंगज, अवधूत एकल, अभिजीत मुसळे. इतर मान्यवर: अरविंद नन्नवरे, मयूर अंगज, अजित कांबळे, शिवतेज कांबळे, यासीन पठाण. यावेळी शाळेतील सर्व शिक्षक, शिक्षकेतर कर्मचारी, ग्रामस्थ आणि पालक मोठ्या संख्येने उपस्थित होते. मान्यवरांनी आपल्या भाषणात नवीन विद्यार्थ्यांच्या उज्ज्वल भविष्यासाठी शुभेच्छा दिल्या आणि शिक्षणाचे महत्त्व अधोरेखित केले.
