कागल-निढोरी रस्त्यावर बेकायदेशीर वृक्षतोड, ‘जागृत मालक फाउंडेशन’ आणि ‘रिपब्लिकन पार्टी ऑफ इंडिया’चा आंदोलन करण्याचा इशारा
कागल (बाळासो कांबळे): दि. १ सप्टेंबर २०२५: सार्वजनिक बांधकाम विभाग, कागल यांच्या देखरेखीखाली नुकत्याच पूर्ण झालेल्या निढोरी-कागल रस्त्याच्या डांबरीकरणानंतर, आता या रस्त्यावरील अनेक झाडे पुन्हा एकदा बेकायदेशीरपणे तोडली जात असल्याचा धक्कादायक प्रकार समोर आला आहे. या वृक्षतोडीमुळे प्रवाशांमध्ये आणि स्थानिक नागरिकांमध्ये तीव्र संताप व्यक्त होत आहे. ‘जागृत मालक फाउंडेशन’ आणि ‘रिपब्लिकन पार्टी ऑफ इंडिया (आठवले)’ यांनी यावर कठोर भूमिका घेत चौकशीची मागणी केली आहे.
नेमका प्रकार काय? सार्वजनिक बांधकाम विभागाकडून २०१९-२०२०मध्ये निढोरी-कागल रस्त्याचे रुंदीकरण आणि डांबरीकरण करण्यात आले होते. त्यावेळी रस्त्याच्या कडेला असलेली अनेक झाडे तोडण्यात आली. आता डांबरीकरण पूर्ण होऊन एक वर्ष पूर्ण होण्याआधीच गेल्या दोन महिन्यांपासून पुन्हा एकदा मोठ्या प्रमाणात झाडांची कत्तल सुरू आहे. कुरणी, भडगाव फाटा, मळगे फाटा, पिंपळगाव फाटा, केनवडे, समृद्धी, व्हनाळी नदी किनारा, सिद्धनेर्ली, वणूर फाटा या भागांत मोठ्या प्रमाणात झाडे तोडण्यात आली आहेत.
प्रशासनावर प्रश्नचिन्ह रस्त्याचे काम पूर्ण झाल्यावरही ही झाडे का तोडली जात आहेत, असा प्रश्न सर्वसामान्य नागरिकांना पडला आहे. ही वृक्षतोड कोणत्या फायद्यासाठी केली जात आहे, याबद्दल संशय व्यक्त केला जात आहे. सार्वजनिक बांधकाम विभाग, कागल यांना याची माहिती नाही का? अधिकारी आणि कंत्राटदार यांच्यात काही मिलीभगत आहे का, असे अनेक प्रश्न आता उपस्थित होत आहेत.
आंदोलनाचा इशारा या बेकायदेशीर वृक्षतोडीची तात्काळ चौकशी करण्याची मागणी ‘रिपब्लिकन पार्टी ऑफ इंडिया (आठवले)’ पक्षाचे सतिश माळगे यांच्या मार्गदर्शनाखाली आणि ‘जागृत मालक फाउंडेशन’च्या वतीने करण्यात आली आहे. ‘जागृत मालक फाउंडेशन’चे जिल्हाध्यक्ष सिकंदर जमादार आणि कागल तालुका प्रतिनिधी बाळासो कांबळे यांनी या प्रकरणाची सखोल चौकशी झाल्याशिवाय स्वस्थ बसणार नाही, असा इशारा दिला आहे. या भ्रष्टाचाराचा पर्दाफाश करण्यासाठी लवकरच आंदोलन केले जाईल, असेही त्यांनी सांगितले आहे.
