डॉ. बाबासाहेब आंबेडकर नगरमधील निकृष्ट दर्जाच्या अंगणवाडीवरून रिपब्लिकन पार्टी आक्रमक; आंदोलनाचा इशारा!
मुरगूड (बाळासो कांबळे) : येथील डॉ. बाबासाहेब आंबेडकर नगरमध्ये काही वर्षांपूर्वी उभारण्यात आलेली अंगणवाडीची इमारत पूर्णपणे निकामी झाली असून, या निकृष्ट कामाविरोधात रिपब्लिकन पार्टी ऑफ इंडिया (आठवले) पक्षाने तीव्र नाराजी व्यक्त केली आहे. जिल्हा सचिव सतीश माळगे यांच्या नेतृत्वाखालील शिष्टमंडळाने या कामाची पाहणी करून संबंधितांवर कारवाई न झाल्यास उपोषण, ठिय्या आंदोलन किंवा नगरपालिकेस टाळे ठोकण्याचा इशारा दिला आहे.
डॉ. बाबासाहेब आंबेडकर सांस्कृतिक भवनाच्या शेजारी काही वर्षांपूर्वी अंगणवाडीचे बांधकाम करण्यात आले होते. या दोन्ही इमारतींमध्ये केवळ चार फुटांचे अंतर आहे. सांस्कृतिक भवनाचे काम आजही चांगल्या स्थितीत असले तरी, अंगणवाडीची इमारत अवघ्या १०-१५ वर्षांतच पूर्णपणे निकामी झाली आहे. भिंतीचा गिलावा निखळला असून, पायऱ्यांवरील फरश्या फुटल्या आहेत. खिडक्या आणि दरवाजे मोडकळीस आले आहेत. यामुळे कामाच्या दर्जाबाबत आणि वापरलेल्या बांधकाम साहित्याबाबत गंभीर प्रश्नचिन्ह निर्माण झाले आहे.
या निकृष्ट कामासाठी कोणता ठेकेदार आणि कोणते मटेरियल वापरले, असा सवाल स्थानिक नागरिकांकडून उपस्थित होत आहे. अनेक जबाबदार अधिकारी या ठिकाणी येऊनही त्यांनी या इमारतीच्या दुर्दशेची साधी दखलही घेतली नाही. “या इमारतीची गरज नव्हती तर बांधली का?” असा परखड प्रश्न आंबेडकर नगरमधील नागरिकांनी उपस्थित केला आहे. दलित वस्ती सुधार योजनेचा निधी फक्त खर्च करण्यासाठीच ही इमारत बांधली का, कोणाच्या फायद्यासाठी हा हट्ट धरला गेला, असेही प्रश्न उपस्थित होत आहेत.
याच खराब इमारतीवर पुन्हा पत्र्याचे शेड मारून अतिरिक्त खर्च करण्यात आल्याचेही शिष्टमंडळाने निदर्शनास आणून दिले. त्यावेळच्या नगरसेवक, नगराध्यक्ष किंवा अधिकाऱ्यांनी जनतेच्या पैशाची उधळपट्टी केली असून, आजच्या प्रशासकीय अधिकाऱ्यांनी तरी या निधीचा योग्य वापर करायला हवा होता, असे मत माळगे यांनी व्यक्त केले.
बौद्ध विहाराचे कामही निकृष्ट दर्जाचे
याच पाहणीदरम्यान, शिष्टमंडळाने शेजारी सुरू असलेल्या बौद्ध विहाराच्या कामाचीही पाहणी केली. हे काम करणारे ठेकेदार संकेत गुजर यांना वारंवार सूचना देऊनही त्यांच्याकडून मनमानी सुरू असल्याचे शिष्टमंडळाने सांगितले. कोल्हापूर जिल्हा सचिव सतीश माळगे यांनी फोनवरून मुख्याधिकारी अतिश वाळूंज यांच्याशी संपर्क साधून या खराब कामाची चौकशी करून कारवाई करण्याची मागणी केली.
यावेळी सतीश माळगे यांच्यासोबत बाबासाहेब कागलकर (कागल तालुका माजी अध्यक्ष), सिकंदर जमादार, राधानगरी तालुका अध्यक्ष कुंडलिक कांबळे, सिकंदर जमादार (पापा), प्रदीप वर्णे आदी प्रमुख पदाधिकारी उपस्थित होते. रिपब्लिकन पक्षाच्या वतीने बाळासो कांबळे सतीश माळगे मार्गदर्शनाखाली या भ्रष्टाचाराला जबाबदार असलेल्यांचा पर्दाफाश केला जाईल आणि यासाठी कोर्टाची लढाई लढण्याची वेळ आल्यास मागे हटणार नाही, असा निर्धारही व्यक्त करण्यात आला. तसेच, “नगरपालिकेतील माजलेल्या ठेकेदारांना त्यांची जागा दाखवून देऊ,” असा इशाराही यावेळी देण्यात आला.
