कोल्हापूर (सलीम शेख ) : महेश राख खून प्रकरणात अटक करण्यात आलेल्या संशयितांची आज करवीर पोलिसांनी फुलेवाडी ते दत्त कॉलनी परिसरात धिंड काढून घटनास्थळांची तपासणी केली. या कारवाईमुळे परिसरात मोठी खळबळ उडाली असून नागरिकांची मोठ्या प्रमाणात गर्दी जमली होती.
१३ सप्टेंबर रोजी पत्नीला पळवून नेल्याच्या वादातून महेश राख याचा गंगाई लॉन येथे निर्घृण खून करण्यात आला होता. या प्रकरणात आदित्य गवळी, धिरज शर्मा, ॠषभ साळोखे, मयूर कांबळे, पियुष पाटील, सद्दाम कुंडले यांच्यासह आठ जणांना अटक करण्यात आली आहे. करवीर पोलीस निरीक्षक किशोर शिंदे, सहाय्यक निरीक्षक बाबासाहेब सरवदे, तसेच अंमलदार विजय तळसकर, सुभाष सरवडेकर, सुजित दावणे, रणजीत पाटील, प्रकाश कांबळे आणि गृहरक्षक दलाच्या पथकाने संशयितांना घटनास्थळी नेऊन तपासाची दिशा स्पष्ट केली. गंगाई लॉन, सिद्धार्थ गवळीचे घर, ज्योती पेट्रोल पंप आणि दत्त कॉलनी परिसरात संशयितांनी कशा प्रकारे हालचाली केल्या, याची माहिती त्यांनी पोलिसांना दिली.
या धिंडीत संशयितांना पाहण्यासाठी रिंग रोड परिसरात नागरिकांनी मोठ्या प्रमाणात गर्दी केली होती. पोलिसांच्या या कारवाईमुळे तपासाला गती मिळण्याची शक्यता असून पुढील तपास सुरू आहे.
