कुरणी ते म्हाकवे रस्त्याच्या दुतर्फा गवत, झुडपांचे साम्राज्य! अपघात टाळण्यासाठी तातडीने उपाययोजना करा; शिवसेनेचे बांधकाम विभागाला निवेदन

कुरणी (प्रतिनिधी : बाळसो कांबळे): कुरणी ते म्हाकवे या १५ किलोमीटरच्या रस्त्याच्या दुतर्फा मोठ्या प्रमाणात गवत आणि झाडे-झुडपे वाढल्याने अपघातांची शक्यता वाढली आहे. यामुळे वाहतुकीस अडथळे येत असून छोटे-मोठे अपघात सातत्याने होत आहेत. या पार्श्वभूमीवर शिवसेना विभाग प्रमुख दिग्विजय पाटील यांनी सामाजिक कार्यकर्ते निलेश पाटील यांच्या समवेत कागल येथील सार्वजनिक बांधकाम विभागाच्या उपअभियंता यांना निवेदन देत तातडीने रस्त्याच्या बाजूकडील पट्या (साईड पट्या) स्वच्छ करण्याची व अपघातप्रवण क्षेत्रावर उपाययोजना करण्याची मागणी केली आहे.

पाच-सहा वर्षांपूर्वी बांधकाम विभागातर्फे कुरणी ते म्हाकवे या १५ किलोमीटर रस्त्याचे काम पूर्ण करण्यात आले होते. मात्र, यावर्षी झालेल्या जोरदार पावसामुळे कुरणीपासून म्हाकवेपर्यंत रस्त्याच्या दोन्ही बाजूस गवत, झाडे व झुडपे मोठ्या प्रमाणात वाढली आहेत.

रस्त्याच्या बाजूला वाढलेल्या या झाडा-झुडपांमुळे वळणांवर वाहने वाहतूक करताना मोठा अडथळा निर्माण होत आहे. समोरून येणाऱ्या-जाणाऱ्या वाहनांचा अंदाज येत नसल्याने छोटे-मोठे अपघात वारंवार घडत आहेत. स्थानिक नागरिकांकडून सातत्याने याबद्दल आवाज उठवण्याची मागणी शिवसेनेकडे होत होती. विशेषतः कुरणी येथील केदार हॉल येथील चौकात अपघातांचे प्रमाण अधिक आहे. रबर फॅक्टरीकडून येणारी वाहने सुसाट वेगाने येत असतात. तसेच कुरणी, भडगाव, मुरगूडकडून येणाऱ्या वाहनांच्या वेगावर नियंत्रण ठेवण्यासाठी नियमानुसार गतिरोधक (स्पीड ब्रेकर) आणि अपघात दर्शक फलक या चौकात नाहीत. त्यातच कडेला वाढलेल्या झुडपांमुळे दृश्यमानता (व्हिजिबिलिटी) कमी होते. यामुळे या ठिकाणी आठवड्यातून दोन ते तीन अपघात घडत आहेत.

या अपघातांमुळे मोठी जीवितहानी होण्याची शक्यता नाकारता येत नाही. त्यामुळे मोठी दुर्घटना घडण्यापूर्वी बांधकाम विभागाने तात्काळ या अपघातप्रवण क्षेत्रात नियमानुसार गतिरोधक, अपघात दर्शक फलक लावावेत आणि रस्त्याच्या बाजूच्या पट्या (साईड पट्या) मोकळ्या कराव्यात, अशी मागणी शिवसेना विभाग प्रमुख व माजी उपसरपंच दिग्विजय पाटील आणि सामाजिक कार्यकर्ते निलेश पाटील यांनी उपअभियंता, बांधकाम विभाग, कागल यांच्याकडे केली आहे. त्यांनी दिलेल्या निवेदनामुळे बांधकाम विभाग यावर काय कार्यवाही करते याकडे आता नागरिकांचे लक्ष लागले आहे.