मुरगूड नगरपरिषद निवडणुकीच्या तोंडावर राजकीय युतीला उधाण: दिवाळीच्या फराळासोबत बैठकांचे सत्र!
मुरगूड (प्रतिनिधी : बाळासो कांबळे,): दिवाळीच्या (Diwali) खमंग आणि खुसखुशीत फराळाच्या मेजवानीसोबतच मुरगूड नगरपरिषद निवडणुकीच्या (Murgud Nagar Parishad Election) राजकीय वर्तुळात सध्या युतीच्या चर्चेला उधाण आले आहे. कागल तालुक्याच्या राजकारणाची समीकरणे कधी आणि कशी बदलतील हे सांगणे कठीण असले तरी, मुरगूडच्या नगरपरिषद निवडणुकीसाठी प्रमुख पक्षांनी मोर्चेबांधणी सुरू केली आहे. आगामी निवडणूक अत्यंत अटीतटीची आणि इर्षेची होणार असल्याचे चित्र स्पष्ट होत आहे.
मुरगूड नगरपरिषदेच्या राजकारणाचे सध्याचे चित्र पाहिले तर दोन प्रमुख गट स्पष्टपणे एकमेकांसमोर उभे ठाकले आहेत.
- राष्ट्रवादी काँग्रेस गट: या गटाचे नेतृत्व राष्ट्रवादीचे नेते मुश्रीफ , रणजितसिंह पाटील आणि राजेखान जमादार यांच्याकडे आहे.
- शिवसेना-भाजप युती गट: या गटात शिवसेनेचे नेते माजी खासदार संजयदादा मंडलिक , नुकताच भाजपमध्ये प्रवेश केलेले प्रविणसिंह पाटील आणि भाजपचे नेते संजयबाबा घाडगे हे प्रबळ दावेदार म्हणून सज्ज आहेत.
दोन तुल्यबळ गटांमुळे ही लढाई अत्यंत चुरशीची होणार आहे. गल्लोगल्ली निवडणुकीच्या चर्चांना जोर आला असून, कोणी दबक्या आवाजात तर कोणी मोठ्याने निकाल जाहीर होण्यापूर्वीच भाकीत करत आहेत. या सर्व राजकीय गदारोळात गोरगरीब मजदुरी करणाऱ्या वर्गाला मात्र या राजकारणाशी फारसे देणेघेणे नाही. कारण, काम केल्याशिवाय त्यांच्या पोटाची खळगी भरणार कशी? मुलांचे शिक्षण, घरातील आजारपण आणि इतर गरजांमध्ये ही गरीब जनता व्यथेत बुडालेली असते. त्यामुळे त्यांना निवडणूक आणि राजकारणापेक्षा दैनंदिन जीवनातील प्रश्नांची चिंता अधिक आहे.
निवडणूक जवळ आली की, सर्वच नेते गरिबांना भेटून, त्यांच्या खांद्यावर हात ठेवून फोटो काढण्यास सज्ज होतात. गरीब जनताही यात काहीकाळ खुश होते, पण निवडून आल्यावर दिलेली आश्वासने पूर्ण करणारा खरा नेता जनतेला हवा आहे. राजकारणात ‘प्लस-मायनस’चे गणित जुळवून विकास करण्याची भाषा करणारे नेते आणि आश्वासनांची पूर्तता करणारा नेता यातला फरक जनता ओळखू लागली आहे. सध्या जनतेच्या सेवेची संधी मिळवण्यासाठी दोन्ही गटांकडून जोरदार जमवाजमव सुरू झाली आहे. मागील निवडणुकीत माजी खासदार संजयदादा मंडलिक यांच्या गटाकडे सत्ता होती आणि यंदाही ते प्रबळ दावेदार मानले जातात. मात्र, सत्तेची समीकरणे कशी जुळतात आणि कोणता कार्यकर्ता ‘प्लस-मायनस’ होतो, यावर अधिक लक्ष दिले जात आहे.
या निवडणुकीत दोन पैलवानांपैकी एक जिंकणार हे निश्चित असले तरी, नेता निवडून येण्यासाठी जातीने लढणारे कार्यकर्ते निवडणुकीनंतर दुर्लक्षित का राहतात? हे आजपर्यंत न सुटलेले कोड कायम आहे. निवडणुकीची रणधुमाळी सुरू होण्यापूर्वीच अनेक नवीन ‘योद्धे’ तिकीट मिळावे यासाठी नेत्यांकडे धडपड करत आहेत. तिकीट न मिळाल्यास अपक्ष लढण्याची ताकद असल्याचा दावा करत अनेकजण तयार आहेत.
कागल तालुक्यातील राजकारणात मोठे वजन असलेले नेते समरजितसिंह घाडगे यांची भूमिका काय असणार याकडे सर्वांचे लक्ष लागले आहे. मागील आमदारकीच्या निवडणुकीत त्यांनी पवार साहेबांची तुतारी हाती घेतली होती. मुरगूड नगरपरिषद निवडणुकीत समरजितसिंह घाडगे दादा ज्या गटात असतील, त्या गटाकडे सत्ता येणार हे निश्चित मानले जात आहे. शेवटी, मुरगूडच्या जनतेच्या मनात काय आहे आणि शिवसेना-भाजपचे कमळ फुलते की राष्ट्रवादीचे घड्याळ हसते, हे पुढील वेळच ठरवेल.
