गोकुळ शिरगाव (प्रतिनिधी): येथील रहिवासी आणि रिपब्लिकन पार्टी ऑफ इंडिया (गवई) पक्षाचे निष्ठावान कार्यकर्ते बबनराव शिंदे यांची पक्षाच्या प्रदेश उपाध्यक्षपदी निवड झाली आहे. त्यांच्या या निवडीबद्दल गोकुळ शिरगाव ग्रामपंचायतीच्या वतीने नुकताच सन्मान करण्यात आला.
ग्रामपंचायतीचे नवनिर्वाचित प्रदेश उपाध्यक्ष म्हणून शिंदेंची निवड झाल्याबद्दल त्यांचे गोकुळ शिरगाव गावच्या वतीने सर्वपक्षीय सदस्यांकडून मानपत्र देऊन स्वागत आणि गौरव करण्यात आला. शिंदे हे गेली ३० वर्षांपासून शिव, शाहू, फुले, आंबेडकर यांच्या विचारसरणीचे पाईक असून, सामाजिक कार्यात सक्रिय आहेत. शिक्षण, क्रीडा, वाचन संस्कृती समाजात रुजावी, यासाठी ते सतत प्रयत्नशील असतात. तसेच, त्यांनी मागासलेल्या व वंचित घटकांना चांगल्या शिक्षणापासून प्रशासकीय सेवेत कसा न्याय मिळेल, यासाठी सातत्याने प्रयत्न केले आहेत.
शिंदे यांच्या कार्याचा गौरव म्हणून, गोकुळ शिरगाव ग्रामपंचायतीकडून मानपत्र देऊन हा गौरव करण्यात आला. याप्रसंगी सरपंच चंद्रकांत डावरे, उपसरपंच संदीप पाटील, तसेच ग्रामपंचायत सदस्य शामराव पाटील (बापू), रणजित पाटील, सत्यजित पाटील, विवेक पाटील, नूतन पाटील, संगीता पाटील, अंबिका पाटील, संगीता गवळी, निता एरंडोले, पुजा गुरव, ग्रामसेवक संदीप धनवडे आणि ग्रामस्थ मोठ्या संख्येने उपस्थित होते.
