सरदार पटेलांच्या १५०व्या जयंतीनिमित्त ‘रन फॉर युनिटी’ला कोल्हापुरात उदंड प्रतिसाद!
कोल्हापूर (सलीम शेख) : भारताचे लोहपुरुष सरदार वल्लभभाई पटेल यांच्या १५०व्या जयंतीचे औचित्य साधून कोल्हापुरात ‘रन फॉर युनिटी’ ( एकता दौड) काढण्यात आली. देशाच्या अखंडतेचा संकल्प घेऊन काढण्यात आलेल्या या दौडला शहरवासीयांकडून उदंड प्रतिसाद लाभला आणि विविध घटकांनी एकत्र येत ही दौड यशस्वी केली.
दसरा चौक मैदान येथे या एकता दौडचा शानदार शुभारंभ करण्यात आला. खासदार धनंजय महाडिक, आमदार अमल महाडिक, भाजपचे प्रदेश सचिव महेश जाधव, महानगर जिल्हाध्यक्ष विजय जाधव, प्रदेश कार्यकारिणी सदस्य राहुल चिकोडे यांच्यासह विविध पदाधिकारी आणि कार्यकर्त्यांच्या उपस्थितीत सर्वप्रथम राजर्षी छत्रपती शाहू महाराजांच्या पुतळ्याला अभिवादन करण्यात आले आणि त्यानंतर दौड सुरू झाली.
ही दौड दसरा चौकातून बिंदू चौक मार्गे छत्रपती शिवाजी महाराज चौकापर्यंत काढण्यात आली.
बिंदू चौक येथे सहभागींनी महात्मा ज्योतिबा फुले आणि महामानव भारतरत्न डॉ. बाबासाहेब आंबेडकर यांच्यासह सर्व हुतात्म्यांच्या स्मृतींना अभिवादन केले.
छत्रपती शिवाजी महाराज चौकात या एकता दौडची सांगता झाली. येथे छत्रपती शिवरायांच्या पुतळ्याला अभिवादन करून ‘भारताची अखंडता टिकवून ठेवण्याची’ सामूहिक शपथ घेण्यात आली. स्वातंत्र्यानंतर देशभरातील संस्थानांना भारतात विलीन करून देशाला एका धाग्यात बांधणाऱ्या लोहपुरुष सरदार वल्लभभाई पटेल यांच्या स्मृतींना अभिवादन करून एकता दौडचा समारोप करण्यात आला.
