मुरगूड नगरपरिषदेच्या दुर्लक्षामुळे नागरिक त्रस्त; तुंबलेल्या गटारींमुळे दुर्गंधी आणि रोगराईची भीती!
मुरगूड(प्रतिनिधी : बाळासो कांबळे): मुरगूड नगरपरिषदेच्या ढिसाळ कारभारामुळे शहरात अस्वच्छतेचे साम्राज्य पसरले आहे. वारंवार तक्रारी करूनही गटारींची साफ-सफाई होत नसल्याने नागरिक त्रस्त झाले असून, दुर्गंधी आणि डासांच्या त्रासाने आरोग्य धोक्यात आले आहे. चिमगाव रोड येथील रहिवासी श्री. सर्जेराव श्रीपती भारमल यांनी तर थेट गटारी माती-मुरमाने बुजवून टाकण्याचा इशारा दिला आहे.
चिमगाव रोडवरील श्री राम मंगल कार्यालयासमोर राहणारे सर्जेराव भारमल यांनी मुरगूड नगरपरिषदेच्या मुख्याधिकारी महोदयांकडे लेखी अर्ज देऊन आपल्या व्यथा मांडल्या आहेत. भारमल यांच्या घरासमोरून जाणाऱ्या गटारी कायम घाण पाणी आणि कचऱ्याने तुडुंब भरलेल्या असतात. यामुळे परिसरात तीव्र दुर्गंधी पसरली असून डासांचा उपद्रव मोठ्या प्रमाणावर वाढला आहे. या सततच्या अस्वच्छतेमुळे परिसरातील रहिवासी वारंवार हिवताप व इतर आजारांनी आजारी पडत आहेत. गटारीतील असह्य दुर्गंधीमुळे त्यांच्या घरी कोणीही पाहुणे येत नसल्याची खंतही भारमल यांनी आपल्या निवेदनात व्यक्त केली आहे.
श्री. भारमल यांनी अनेकवेळा मुरगूड नगरपरिषदेचे मुख्याधिकारी यांच्याकडे याबाबत तोंडी आणि लेखी म्हणणे मांडले आहे. मात्र, नगरपरिषदेने या गंभीर समस्येकडे पूर्णपणे दुर्लक्ष केले आहे. भारमल यांच्या तक्रारीची दखल घेण्यात आली नाहीच, शिवाय त्यांनी स्वच्छता विभागाकडील मुकादम यांना प्रत्यक्ष येऊन पाहणी करण्यास सांगितले असता, तेही फिरकले नाहीत. प्रशासनाच्या या उदासीन आणि बेजबाबदार भूमिकेमुळे संतप्त झालेल्या श्री. भारमल यांनी नगरपरिषदेला अंतिम इशारा दिला आहे. त्यांनी आपल्या अर्जात स्पष्टपणे नमूद केले आहे की, जर पुढील दोन-तीन दिवसांत गटारीची साफ-सफाई झाली नाही, तर ते टॅक्टरच्या सहाय्याने माती व मुरुम टाकून गटारी बुजवून टाकतील आणि गटारातील पाणीपुरवठा बंद करतील.
श्री. भारमल यांचा इशारा: “गटारी बंद केल्यामुळे जर गटारीचे घाण पाणी रस्त्यावरून वाहत गेल्यास, त्याला मी जबाबदार असणार नाही.” हा संतप्त इशारा मुरगूड नगरपरिषदेला खडबडून जागा करतो की नाही, याकडे परिसरातील नागरिकांचे लक्ष लागून राहिले आहे. या निवेदनाच्या प्रती कागल तहसिलदार, प्रांत कार्यालय, जिल्हाधिकारी कार्यालय तसेच मुंबई मंत्रालयाकडे पाठवण्यात आल्या आहेत. अनेक महिन्यांपासून मागणी करूनही गटार स्वच्छ होत नसल्याने, “स्वच्छ मुरगूड, सुंदर मुरगूड” हा नगरपरिषदेचा केवळ दिखावाच आहे का? असा संतप्त प्रश्न येथील नागरिकांना पडला आहे.
मुरगूड नगरपरिषद श्री. भारमल यांच्या निवेदनाकडे लक्ष देणार का? नागरिकांना दुर्गंधीचा होणारा त्रास थांबवणार का? आणि स्वच्छ मुरगूडचा नारा प्रत्यक्षात जपणार का? हे पाहणे महत्त्वाचे ठरणार आहे.
