कोल्हापूर शहर वाहतूक शाखेची कारवाई : २६६ वाहनचालकांवर दंडात्मक कारवाई, ₹२ लाखांहून अधिक दंड वसूल!
कोल्हापूर (कोटा न्यूज नेटवर्क) : कोल्हापूर शहरातील वाहतुकीला व पादचारी मार्गांना अडथळा निर्माण करणाऱ्या वाहनधारक आणि दुकानदारांवर कोल्हापूर शहर वाहतूक नियंत्रण शाखेकडून कठोर कारवाई करण्यात आली. या संयुक्त मोहिमेत २६६ वाहनचालकांवर कारवाई करून एकूण ₹२,०४,४००/- इतका दंड वसूल करण्यात आला.
वाहतूक शाखेच्या माहितीनुसार, शहरातील सीपीआर चौक, भवानी मंडप, जेलरोड, बिंदूचौक, मिलन हॉटेल परिसर या भागात दुकानदारांनी आपले स्टँडिंग बोर्ड, पायाड, बाकडी, टेबल, चप्पल बॉक्स रस्त्यावर ठेवून पादचारी आणि वाहनवाहतुकीस अडथळा निर्माण केला होता. त्यामुळे महानगरपालिका अतिक्रमण विभागाच्या मदतीने २६ स्टँडिंग बोर्ड, १५ पायाड, ६ बाकडी, ४ टेबल व ३ चप्पल बॉक्स जप्त करण्यात आले.
तसेच शहरातील मलबार हॉटेल चौक, खानविलकर पेट्रोल पंप, गोखले कॉलेज चौक, विवेकानंद कॉलेज परिसर, सायबर चौक या ठिकाणी दुचाकी आणि चारचाकी वाहनांनी केलेल्या अवैध पार्किंगवरही कारवाई करण्यात आली. या कारवाईसाठी ४ क्रेन वाहने, २ पेट्रोलिंग बाईक, २५ पोलीस अंमलदार आणि महानगरपालिकेचे अधिकारी व कर्मचारी यांनी सहभाग घेतला.
ही मोहीम वरिष्ठ अधिकारी यांच्या मार्गदर्शनाखाली पोलीस निरीक्षक नंदकुमार मोरे यांच्या नेतृत्वात पार पडली.
वाहतूक शाखेने सर्व नागरिक आणि वाहनधारकांना आवाहन केले आहे की, बेशिस्त पार्किंग, दुहेरी पार्किंग किंवा पादचारी मार्ग अडवणारे प्रकार टाळावेत, अन्यथा पुढील काळात अशा उल्लंघनांवर मोठ्या प्रमाणात दंडात्मक कारवाई करण्यात येईल.
