मुरगूड नगरपरिषद निवडणूक: नगराध्यक्ष पदासाठी ९, तर नगरसेवक पदासाठी ११६ अर्ज अपात्र; तिरंगी लढतीची शक्यता!

मुरगूड (प्रतिनिधी – बाळासो कांबळे ): मुरगूड नगरपरिषदेच्या आगामी निवडणुकीसाठी दाखल झालेल्या उमेदवारी अर्जांच्या छाननीमध्ये मोठा उलटफेर झाला असून, नगराध्यक्ष पदासाठी दाखल झालेल्या १२ पैकी ९ अर्ज अपात्र ठरले आहेत. त्याचप्रमाणे, नगरसेवक पदासाठी दाखल झालेल्या २०६ अर्जांपैकी तब्बल ११६ अर्ज अपात्र ठरल्याने निवडणुकीची रणधुमाळी अधिक तीव्र झाली आहे.

छाननी प्रक्रियेनंतर नगराध्यक्ष पदासाठी केवळ ३ उमेदवार पात्र ठरले आहेत, तर नगरसेवक पदासाठी ९० उमेदवार निवडणूक लढवण्यास पात्र ठरले आहेत. नगराध्यक्ष पदासाठी वैध ठरलेल्या तीन उमेदवारांमध्ये प्रामुख्याने शिवसेना (शिंदे गट) आणि राष्ट्रवादी काँग्रेस यांच्यात थेट लढत होण्याची शक्यता वर्तवली जात आहे.

नगराध्यक्ष पदासाठी पात्र उमेदवार:

सध्याच्या राजकीय गणितानुसार, सौ. सुहासिनीदेवी पाटील (शिवसेना) विरुद्ध सौ. तस्नीम जमादार (राष्ट्रवादी) यांच्यात काट्याची सरळ लढत होण्याची शक्यता आहे. नगराध्यक्ष पदाच्या शर्यतीत शाहू आघाडीकडून सौ. सुजाता अनिल अर्जुने यांचा अर्ज वैध ठरला असला तरी, त्या काय पवित्रा घेतात, याकडे संपूर्ण मुरगूड शहराचे लक्ष लागले आहे. अर्ज माघारी घेण्याच्या अंतिम मुदतीनंतरच निवडणुकीचे खरे चित्र स्पष्ट होईल, मात्र सध्या ही लढत तिरंगी होणार की दोन प्रमुख पक्षांत मर्यादित राहणार, याची उत्सुकता शिगेला पोहोचली आहे. या निवडणुकीत मोठी चुरस आणि अटीतटीची लढत पाहायला मिळेल, अशी चर्चा राजकीय वर्तुळात रंगू लागली आहे.