कोल्हापूर: नवीन वाशी नाका बांधकाम कामगार सेतू केंद्रावर अनागोंदी कारभार आणि मनमानी! गोरगरिबांची गळचेपी?
कोल्हापूर (बाळासो कांबळे): महाराष्ट्र इमारत व इतर बांधकाम कामगार कल्याणकारी मंडळ, मुंबई यांच्या कोल्हापूर येथील नवीन वाशी नाका सेतू केंद्रावर अत्यंत मनमानी आणि अनागोंदी कारभार सुरू असल्याचा गंभीर आरोप होत आहे. दि. २८ नोव्हेंबर २०२५ रोजी अनेक गोरगरीब बांधकाम कामगारांचे अर्ज (फॉर्म) किरकोळ कारणे (क्यूरी) काढून रिजेक्ट केले जात असल्याने तीव्र संताप व्यक्त होत आहे. जेव्हा या केंद्रावर अर्ज रिजेक्ट होण्याबाबत विचारणा करण्यात आली, तेव्हा एकापेक्षा अधिक कर्मचारी समाधानकारक उत्तर न देता उलट-सुलट उत्तरे देताना दिसले. त्यांच्या बोलण्याची पद्धत (लकप) ही अत्यंत वेगळी आणि अरेरावीची होती, ज्यामुळे अनेक नागरिकांच्या तक्रारींमध्ये भर पडली. अनेक राजकीय संघटना आणि पक्षांच्या पाठिंब्यामुळे हे कर्मचारी स्वतःला उच्चभ्रू (क्लास वन) अधिकारी समजत असल्याचा आरोप नागरिकांनी केला आहे. करवीर सेतू केंद्र आणि कोल्हापूर डिस्ट्रिक्ट सेतू केंद्र येथे फॉर्म रिजेक्ट होण्याचे प्रमाण नगण्य असताना, केवळ वाशी नाका केंद्रावरच अर्ज मोठ्या संख्येने रिजेक्ट केले जात आहेत. जानूनबुजून लाभ नाकारले? लग्नाचे लाभ, शिष्यवृत्ती यांसारख्या गोरगरीबांच्या अत्यंत महत्त्वाच्या लाभांचे अर्ज जाणूनबुजून रिजेक्ट केले जात असल्याचा प्रश्न उपस्थित होत आहे.
या सेतू केंद्रावर वशिलेबाजी आणि आर्थिक व्यवहार चालत असल्याचा थेट आरोप होत आहे. “येथे वशीलेबाज बसले आहेत. त्यांची कामे त्वरित आणि प्रामाणिकपणे पूर्ण केली जातात. त्यांच्या कामांना ब्रेक लावला जातो किंवा फॉर्म रिजेक्ट केले जातात,” अशी गंभीर तक्रार अनेक कामगारांनी केली आहे. सर्वात धक्कादायक बाब म्हणजे, कोल्हापूर जिल्ह्यातील बांधकाम कामगारांचे अर्ज रिजेक्ट केले जात असताना, सीमाभागातील कर्नाटकमधील लोकांची कामे कोणतीही अडचण न येता केली जात आहेत. कर्नाटकातील नोंदणीसाठी भरमसाठ पैसे घेऊन त्यांना लाभ दिले जात आहेत. कोल्हापूर जिल्ह्याच्या तुलनेत कर्नाटकातील लोकांना भांडी संच, अत्यावश्यक संच, पेटी आणि इसेन्स किट यांसारखे अनेक लाभ अधिक प्रमाणात दिले गेले आहेत, ज्यामुळे कोल्हापूर जिल्ह्यातील लाभार्थ्यांची संख्या कमी दिसत आहे. या गैरव्यवहाराची चर्चा संपूर्ण जिल्ह्यामध्ये सुरू आहे.
या सर्व गैरकारभाराविरोधात रिपब्लिकन पार्टी ऑफ इंडिया (आठवले गट) ने आवाज उठवला आहे. कोल्हापूर जिल्हा सचिव सतीश माळगे यांच्या नेतृत्वाखाली भविष्यात मोठे आंदोलन छेडण्याचा इशारा देण्यात आला आहे. तसेच, वाशी नाका सेतू केंद्रावरील संबंधित कर्मचाऱ्यांची चौकशी झाल्याशिवाय स्वस्थ बसणार नाही, असा निर्धार त्यांनी व्यक्त केला आहे. गोरगरीब जनसामान्यांच्या पोटावर पाय देणाऱ्या, मगरूर कर्मचाऱ्यांवर शाहुपुरी कार्यालयाकडून कोणती कारवाई केली जाणार, याकडे आता संपूर्ण जिल्ह्यातील बांधकाम कामगारांचे लक्ष लागले आहे. “जे खरे बांधकाम कामगार आहेत, त्यांना न्याय नाही, आणि जे मोठे आहेत, पैसे देतात, त्यांची कामे घरी बसून केली जातात,” अशी खंत कामगार व्यक्त करत आहेत.
