सीपीआर रुग्णालयातील ‘महाघोटाळा’ उघड; खोटे अपंग दाखले देऊन सरकार व दिव्यांगांवर अन्याय- संजय पवार यांचा गंभीर आरोप!
कोल्हापूर (सलीम शेख ) : कोल्हापुरातील छत्रपती प्रमिलाराजे सर्वोपचार रुग्णालय (सीपीआर) येथील आरोग्य विभागातील महाघोटाळ्याचे भांडे शिवसेना नेते संजय पवार यांनी फोडले आहे. त्यांनी सीपीआर प्रशासनावर गंभीर आरोप केले असून, हा केवळ घोटाळा नसून खोटे अपंगत्वाचे दाखले देऊन पैसे कमावणे आणि सरकारची फसवणूक करून दिव्यांगांवर मोठा अन्याय करण्याचे मोठे रॅकेट सरकारी दवाखान्यात चालू असल्याचा त्यांनी खुलासा केला आहे.संजय पवार यांनी केलेल्या आरोपानुसार, सीपीआर रुग्णालयात खोटे अपंग प्रमाणपत्र बनवण्याचा गोरखधंदा मोठ्या प्रमाणात चालू आहे.या भ्रष्टाचारात प्रत्येक गोष्टीचा ‘मेनू कार्ड’ (दर) ठरलेला आहे.
या माध्यमातून गरजू दिव्यांग व्यक्तींना न्याय मिळण्याऐवजी त्यांच्या हक्कावर गदा आणली जात आहे.हा प्रकार सरकारी दवाखान्यात चालू असणे अत्यंत दुर्दैवी आहे, असे मत त्यांनी व्यक्त केले.हा केवळ आरोग्य विभागातील घोटाळा नसून ‘महाघोटाळा’ आहे, असे त्यांचे म्हणणे आहे.
या गंभीर प्रकरणाची सखोल आणि तात्काळ चौकशी करण्याची मागणी संजय पवार यांनी केली आहे. त्यांनी पालकमंत्री तसेच आरोग्य मंत्री प्रकाश आंबिटकर आणि हसन मुश्रीफ यांनी या प्रकरणाची दखल घेऊन चौकशी करावी अशी मागणी लावून धरली आहे.या घोटाळ्यात सहभागी असलेले सर्व डॉक्टर आणि संबंधित अधिकारी/कर्मचारी यांच्यावर कठोर कारवाई करण्याची मागणी जोर धरू लागली आहे.या घटनेमुळे कोल्हापूरच्या आरोग्य विभागात मोठी खळबळ उडाली आहे.
