मुंबई: फुटबॉल जगतातील महान खेळाडू आणि अर्जेंटिनाचा कर्णधार लिओनेल मेस्सी यांच्या भारत दौऱ्यातील मुंबई भेटीला वानखेडे स्टेडियमवर ऐतिहासिक स्वरूप प्राप्त झाले. महाराष्ट्राचे मुख्यमंत्री देवेंद्र फडणवीस यांच्या हस्ते मेस्सी यांचे अत्यंत उत्साहात आणि अनोख्या पद्धतीने स्वागत करण्यात आले. वानखेडे स्टेडियमवर चाहत्यांच्या अलोट गर्दीत आणि ‘मेस्सी… मेस्सी…’च्या घोषणांच्या गजरात मेस्सी यांनी जेव्हा पाऊल ठेवले, तेव्हा उपस्थितांचा उत्साह शिगेला पोहोचला होता. या अभूतपूर्व स्वागत सोहळ्यात मुख्यमंत्री देवेंद्र फडणवीस यांनी मेस्सी यांना तथागत गौतम बुद्धांची सुंदर प्रतिमा भेट देऊन त्यांचा सत्कार केला.
फुटबॉलच्या या महानायकाला बुद्धांची प्रतिमा भेट देण्यामागे एक विशेष विचार होता. गौतम बुद्धांची प्रतिमा शांती, ज्ञान आणि ध्यानाचे प्रतीक मानली जाते. खेळाच्या मैदानावर सातत्याने उत्कृष्ट कामगिरी करण्यासाठी आवश्यक असलेल्या एकाग्रता आणि शांत वृत्तीची प्रेरणा मेस्सी यांना मिळावी, हा त्यामागचा उद्देश होता. या अनोख्या भेटीमुळे मुख्यमंत्र्यांनी जागतिक स्तरावरील या खेळाडूला भारतीय संस्कृतीचा आणि तत्त्वज्ञानाचा एक अमूल्य ठेवा भेट दिला. बुद्धांचे विचार समानता आणि विनम्रतेवर भर देतात, जे मेस्सी यांच्या मैदानावरील शांत आणि विनम्र व्यक्तिमत्त्वाशी मिळणारे आहेत.
मेस्सी आणि मुख्यमंत्री फडणवीस यांच्या हस्ते यावेळी ‘प्रोजेक्ट महादेव’ या महत्त्वाकांक्षी क्रीडा विकास प्रकल्पाचे उद्घाटन करण्यात आले. मुख्यमंत्र्यांनी यावेळी बोलताना, “मेस्सी तुम्ही जगभरातील तरुण खेळाडूंसाठी प्रेरणा आहात. तुमच्या उपस्थितीमुळे महाराष्ट्रातील खेळाडूंना अधिक मेहनत करण्याची आणि आंतरराष्ट्रीय स्तरावर चमकण्याची प्रेरणा मिळेल,” असा विश्वास व्यक्त केला. यावेळी क्रिकेटचा देव सचिन तेंडुलकर आणि भारतीय फुटबॉल संघाचा कर्णधार सुनील छेत्री यांच्यासह अनेक मान्यवर आणि सेलिब्रिटी उपस्थित होते. मेस्सी यांच्या या मुंबई दौऱ्यामुळे भारतीय क्रीडाविश्वात एक नवा उत्साह संचारला आहे.
