मुरगूड नगरपरिषदेत मंडलिक-पाटील युतीची ‘वज्रमूठ’; विरोधकांचा १६-४ असा धुव्वा, हुकूमशाहीचा अंत!

मुरगूड | प्रतिनिधी: (बाळासो कांबळे): मुरगूड नगरपरिषदेच्या रणधुमाळीचा निकाल आज, २१ डिसेंबर २०२५ रोजी जाहीर झाला असून, यात माजी खासदार संजयदादा मंडलिक आणि माजी नगराध्यक्ष प्रविणसिंह पाटील यांच्या युतीने ऐतिहासिक विजय मिळवला आहे. “गर्वाचे घर खाली” या उक्तीप्रमाणे जनतेने सत्ताधाऱ्यांच्या हुकूमशाहीला नाकारत विरोधकांना १६ विरुद्ध ४ अशा फरकाने धूळ चारली आहे. या निवडणुकीत हसन मुश्रीफ आणि समरजितसिंह घाटगे यांसारखे तगडे नेते एका बाजूला असतानाही, मुरगूडच्या जनतेने मंडलिक-पाटील युतीवर विश्वास टाकला. प्रचारादरम्यान विरोधकांनी अत्यंत खालच्या पातळीवर जाऊन टीका केली होती, मात्र मतदारांनी ‘अति तिथे माती’ हे सिद्ध करून दाखवले. माजी नगराध्यक्ष राजेखान जमादार यांना स्वत:चे नगरसेवक पदही टिकवता आले नाही, ही या निकालाची सर्वात मोठी चर्चा ठरली आहे.

जनतेमध्ये सत्ताधाऱ्यांच्या कारभाराबद्दल प्रचंड रोष होता. प्रामुख्याने खालील मुद्द्यांमुळे सत्ताधाऱ्यांना जनतेने नाकारले:

• अपूर्ण विकासकामे: शहरातील पाणी पुरवठा योजना अद्यापही सुरळीत झाली नाही.

• कामकाजातील त्रुटी: अंडरग्राउंड लाईट आणि सांडपाणी प्रकल्पाचे काम पूर्णपणे फेल गेल्याने नागरिकांना नाहक त्रास सहन करावा लागला.

• भ्रष्टाचाराचे आरोप: स्वच्छता कामगारांच्या कमिशनमध्येही भ्रष्टाचार झाल्याच्या चर्चेने मतदारांमध्ये संताप होता.

• हुकूमशाही वृत्ती: पत्रकारांना मारहाण करणे आणि ‘हम करे सो कायदा’ अशा पद्धतीने कारभार करण्याच्या वृत्तीला जनतेने मतपेटीतून उत्तर दिले आहे.

निवडणुकीत विजयाचा जल्लोष करत असतानाच, एक वेगळा आदर्श यावेळी पाहायला मिळाला. रिपब्लिकन पार्टी ऑफ इंडिया आणि कोल्हापूर टाईम्सचे प्रतिनिधी बाळासो कांबळे, सिताराम कांबळे व त्यांच्या मित्रपरिवारातर्फे सर्व विजयी उमेदवारांना भारतीय संविधान, डॉ. नरेंद्र दाभोळकर आणि सावित्रीबाई फुले यांची पुस्तके देऊन सन्मानित करण्यात आले. इथून पुढचा कारभार लोकशाही मूल्यांना स्मरून आणि पारदर्शक पद्धतीने करावा, अशा शुभेच्छा यावेळी देण्यात आल्या.

निकालाचे थोडक्यात स्वरूप:

• नगराध्यक्ष: सुहासिनीदेवी प्रविणसिंह पाटील (शिवसेना शिंदे गट – मंडलिक-पाटील युती) यांनी विजय मिळवला आहे.

• पक्षीय बलाबल: एकूण २० जागांपैकी १६ जागांवर युती विजयी झाली असून, विरोधकांना (हसन मुश्रीफ गट) केवळ ४ जागांवर समाधान मानावे लागले आहे.

• सर्वात धक्कादायक निकाल म्हणजे मागील नगराध्यक्ष राजेखान जमादार यांचा झालेला पराभव. प्रभाग क्रमांक ५ (अ) मधून त्यांना स्वतःची जागाही राखता आली नाही.

• तसेच, विरोधकांचे (मुश्रीफ आणि घाटगे गट) अनेक दिग्गज उमेदवार या निवडणुकीत पराभूत झाले आहेत.

विजयानंतर केवळ जल्लोष न करता, विजयी उमेदवारांना भारतीय संविधान आणि समाजसुधारकांची पुस्तके देऊन सन्मानित करणे, हा एक नवीन राजकीय पायंडा मुरगूडमध्ये पडला आहे. यामुळे “कोल्हापूर टाईम्स” आणि रिपब्लिकन पार्टी ऑफ इंडियाच्या कार्याचे शहरात सर्वत्र कौतुक होत आहे.